एजेन्सी

इरानमा उच्च सरकारी अधिकारीहरूलाई पनि धमाधम कोभिड-१९ को संक्रमण देखिन थालेको छ। अन्तर्राष्ट्रिय सञ्चारमाध्यमहरूका अनुसार बिहीबार त्यहाँकी उपराष्ट्रपति मसुमेह इब्तेकरलाई पनि कोभिड-१९ देखिएको छ। उनी इरानका चार जना उपराष्ट्रपतिमध्ये  महिला मामिलासम्बन्धी उपराष्ट्रपति हुन्। क्याबिनेट बैठकमा इब्तेकर राष्ट्रपति हसन रूहानीको नजिकै बस्ने गर्थिन्। बिहीबार पनि उनी क्याबिनेट बैठकमा सहभागी भएकी थिइन्।

कोभिड-१९ को संक्रमण देखिएपछि उनी अहिले घरमै क्वारेन्टाइन बसिरहेको इरानी मिडियाले जनाएका छन्।

इरानमा कोभिड-१९ बाट संक्रमित हुने उनी सातौं उच्च सरकारी अधिकारी हुन्। अरू कुनै पनि देशमा उच्च तहका यति धेरै सरकारी अधिकारीलाई उक्त भाइरसले छोएको छैन।

इरानमा यसअघि उपस्वास्थ्य मन्त्रीलाई कोभिड-१९ देखिएको थियो। इरानका सांसद तथा संसदको राष्ट्रिय सुरक्षा तथा विदेश नीति समितिका प्रमुख मोज्ताबा जोल्नुर, सांसद मोहम्मद सादेगी,  तेहरानका एक मेयर मोर्ताजा रहमानजादा, कोम सहरका स्वास्थ्य विश्वविद्यालयका निर्देशक डाक्टर मोहम्मद रेजा गादिर र भ्याटिकनका लागि पूर्वइरानी राजदूत हादी खोस्रोसाहीलाई कोभिड-१९ भएको छ। तीमध्ये ८१ वर्षीय हादीको सोही बिरामका कारण ज्यान गइसकेको छ।

इरानमा कोभिड-१९ बाट अहिलेसम्म २६ जनाको ज्यान गएको छ भने २ सय ४५ जना संक्रमित भएका छन्। बन्द समाज र  कमजोर स्वास्थ्य प्रणाली भएकाले संक्रमितको संख्या योभन्दा धेरै हुने अनुमान गरिएको छ।

इरानमा सबैभन्दा बढी कोम सहरमा कोभिड-१९ को संक्रमण देखिएको छ। संक्रमितको संख्या दिनदिनै बढ्दै गएपछि शुक्रबारको प्रार्थनाहरू रद्ध गरिएको छ। स्कुल र विश्वविद्यालय मार्च २१ सम्मका लागि बन्द गरिएको छ। साथै सबै प्रकारका सांस्कृतिक र खेलकुद कार्यक्रम पनि रोकिएको छ।

इरानमा चीनबाट कोभिड-१९ पुगेको विश्वास गरिएको छ। अमेरिकालगायत पश्चिमा राष्ट्रहरूले प्रतिबन्ध लगाएको इरान र  चीनबीच अहिले पनि सुमधुर सम्बन्ध छ। चीनसँगको व्यापार इरानको अर्थतन्त्रलाई  सहयोग पुगेको छ।

चीनले शुक्रबार कोभिड-१९ जाँच्ने बीस हजार किट इरानलाई दिन लागेको छ।  कोभिड-१९ जाँच्ने प्रयोगशालामा पनि २ बाट  ७ पुर्‍याएको छ भने अर्को सातासम्म ती प्रयोगशालाको संख्या २२ पुग्ने जनाइएको छ।