समाधान संवाददाता, पोखरा

नेपाल कम्युनिस्ट पार्टी (नेकपा) ओली समूहका नेता टोपबहादुर रायमाझीले पुष्पकमल दाहाल प्रचण्डलाई चुनाव जितेर प्रधानमन्त्री बन्न चुनौती दिएका छन् ।

प्रचण्ड जनताको मत लिन डराएको भन्दै उनले जनमतलाई विश्वास नगरेको बताए ।

गण्डकी प्रदेशबाट मनोनित नेकपा केन्द्रीय सदस्यको भेलामा बुधबार रायमाझीले यस्तो बताएका हुन् ।

‘जनादेशमा जाने कुरामा उहाँहरु किन डराएको ? जनतामा किन विश्वास नगरेको ? जनताको मत जितेर प्रधानमन्त्री बन्ने आँट गर्नुहोस् कमरेड प्रचण्ड,’ उनले भने ।

नेकपा प्रचण्ड–माधव समूहले माधवकुमार नेपाललाई अध्यक्ष बनाएको प्रति उनले कटाक्ष व्यक्त गरे ।

ओलीलाई अध्यक्षबाट हटाएर महाधिवेशनमा ओलीसँगै पराजित भएका नेतालाई अध्यक्ष बनाइनु हाँस्यास्पद रहेको उनको भनाइ थियो । ‘विधि र पद्धतिको कुरा गर्ने माधव नेपाललाई अध्यक्ष हुन किन अप्ठेरो नलागेको ?’ उनी प्रश्न गर्छन् ।

आफ्नो स्वार्थका लागि हरेक ठाउँमा अस्तव्यस्तता सिर्जना गर्नु प्रचण्डको पुरानो रोग भएको उनको भनाइ छ ।

‘हरेक ठाउँमा भद्रगोल गर्नु प्रचण्डको रोग नै हो, त्यो त हामी भोगेर र व्यहोरेर आएको हो,’ उनले भने, ‘प्रधानमन्त्री ओलीज्यूलाई पनि उनको भद्रगोल व्यवहारकै कारण जनादेशमा जानुको विकल्प थिएन, अन्यथा मुलुक अराजकतामा जाने थियो ।’

३ दशकदेखि आफूलाई टीका लगाएर अध्यक्ष बनाएको र महाधिवेशन सामना गर्न प्रचण्डले डर मान्ने गरेको उनको आरोप थियो ।

रायमाझीले सबै केन्द्रीय सदस्यलाई ढुक्क भएर चुनावमा केन्द्रित हुन आह्वान गरे ।

‘नेकपा र चुनाव चिह्न सूर्य केपी शर्मा ओली नेतृत्वको पार्टीकै हुन्छ, ढुक्क भएर उच्च आत्मबलका चुनावमा लाग्नुुस्,’ उनले भने ।

गण्डकी प्रदेशका मुख्यमन्त्रीसमेत रहेका नेकपा स्थायी कमिटी सदस्य पृथ्वीसुब्बा गुरुङले सबै नेताहरुले ओलीलाई विश्वास गर्नुपर्ने बताए ।

ओलीले देश विकासको खाका तयार गरेकाले उनको विश्वास गर्नुपर्ने उनको तर्क थियो ।

‘सुखी नेपाली, समृद्ध नेपालको स्पष्ट नीति, खाका र दृष्टिकोणकासाथ अगाडि बढेको राजनेता केपी ओली हो,’ उनले भने, ‘उहाँलाई विश्वास गरेर अघि बढौं ।’

समृद्धि, लोकतन्त्र र राष्ट्रवादको नायक केपी ओली नै भएको भन्दै उनकै नेतृत्वमा देशको सपना पुरा हुने उनको विश्वास थियो ।

आफ्नै पार्टीको नेतृत्वको सरकारविरुद्ध अविश्वासको प्रस्ताव लैजाने षडयन्त्रकारीहरुको योजना असफल भएको गण्डकी प्रदेशका आर्थिक मामिला तथा योजना मन्त्री किरण गुरुङको भनाइ थियो ।

‘देशमा राजनीतिक अस्थिरता निम्त्याउन खोज्नेहरुको षडयन्त्र असफल भएको छ । यो सत्य जनताको बीचमा लगौँ,’ उनले भने ।

केन्द्रीय सदस्य तथा गण्डकी प्रदेश सहइन्चार्ज खगराज अधिकारीले आफूहरुले दुईतिहाई बहुमत ल्याउने र जनताले प्रचण्ड–माधव समूहलाई आफ्नो मतद्वारा सजाय दिने विश्वास प्रकट गरे ।

नेकपा गण्डकी प्रदेशबाट प्रतिनिधित्व गर्ने पुराना र नयाँ मनोनित केन्द्रीय सदस्यहरुको विशेष भेला काठमाडौंमा भएको थियो । भेलाको अध्यक्षता युवा तथा खेलकुद मन्त्री जगत विश्वकर्माले गरेका थिए ।

भेलामा भूमि व्यवस्था, सहकारी तथा गरिबी निवारण मन्त्री पद्मा अर्यालले स्वागत मन्तव्य राखेकी थिइन् । भेलाको सञ्चालन गोविन्दबहादुर नेपालीले गरेका थिए ।