पोखरा (समाधान)–राष्ट्रिय परीक्षा बोर्डले एसइईको परीक्षाफल आगामी हप्ताभित्र सार्वजनिक गर्ने भएको छ । बिहीबार राष्ट्रिय परीक्षा बोर्डमा एसइईको मूल्यांकन प्रगतिबारे भएको छलफलमा बोर्ड अध्यक्ष प्राडा चन्द्रमणि पौडेलले यो जानकारी दिएका हुन् ।

गत जेठ १३ गतेदेखि तय भएको एसइई परीक्षा कोरोना भाइरस संक्रमणको दोस्रो लहर तीव्र रुपमा फैलन थालेपछि स्थगित भएको थियो । बोर्डले ‘कक्षा १० को विद्यार्थी मूल्यांकन कार्यविधि, २०७८’ ल्याउँदै आन्तरिक मूल्यांकन गर्न निर्देशन दिएको थियो ।

कार्यविधिले विद्यार्थीको निर्माणात्मक २० प्रतिशत (विद्यार्थीको हाजिरी, प्रस्तुति लगायतको विषय), निर्णयात्मक ५५ प्रतिशत (विद्यालयले लिएको त्रैमासिक परीक्षाको मूल्यांकन) र प्रयोगात्मकको लागि २५ प्रतिशत मूल्यांकन तोकेको छ ।