पोखरा ।
हिल प्वाइन्ट मावि माटेपानी पोखरा–१२ को ललितकला विभागको प्रायोगिक कक्षाका रुपमा प्रत्यक्ष चित्रकला घुम्ती कार्यक्रम भएको छ ।

चित्रकारले आफ्नो ग्यालरी वा घरभित्र नभई जनताका माझमा गएर जनताकै अगाडि उनीहरुले हेर्दाहेर्दै तत्काल उनैको चित्र बनाएर उनैका हातमै दिने रमाइलो पक्ष वा विशेषता कार्यक्रमको थियो । कार्यक्रमका लागि बागलुङ कालिका मन्दिरको आँगन र कुश्मा अग्लो झोलुंगे पुलनेरको स्थान चयन भएको थियो ।

प्रत्यक्ष पोट्रेट, लाइव स्केच, चित्रकला कार्यशाला र चित्रकला प्रदर्शनी चारवटा विधा एकैपटक सञ्चालित कार्यक्रममा कक्षा ११ का विद्यार्थीका साथै शिक्षक बाबुराम बस्ताकोटी, सुरेन्द्र अधिकारी र सुदिन श्रेष्ठको संलग्नता थियो । कार्यक्रममा सर्वसाधारण जनताको चाख र उपस्थितिका बीचमा विद्यार्थीले चित्र बनाएर वा बेचेर अर्थलाभ पनि गरेका थिए ।