पोखरा ।
एकीकृत अखिल नेपाल शिक्षक संगठन, जिल्ला समन्वय समिति कास्कीले प्रथम जिल्ला परिषद्का अवसरमा शैक्षिक क्षेत्रमा योगदान गरेका विभिन्न व्यक्तित्वलाई बिहीबारसम्मान गरेको छ ।

आफूले काम गरेका विद्यालयहरूको चौतर्फी विकासमा भूमिका खेलेका भन्दै सम्मानित हुने प्रधानाध्यापकहरूमा माछापुच्छ्रे मावि माछापुच्छ्रे २ का प्रधानाध्यापक सन्तोष आचार्य, विन्ध्यवासिनी मावि, पोखरा १६ का प्रधानाध्यापक कृष्णप्रसाद आचार्य, निष्पक्ष मावि माछापुच्छ्रे ५ का प्रधानाध्यापक दुर्गाबहादुर रावत, शिवालय मावि रूपा–२ (हालः कालिका मावि, पोखरा ३३) का प्रधानाध्यापक रुपिन्द्र प्रभावी सम्मानित भए ।

अमरसिंह माविका प्रधानाध्यापक शेरबहादुर थापा, रतनपाण्डे माविका प्रधानाध्यापक डिल्लीराम बराल, धनुबाँस कालिका मावि मादीका प्रधानाध्यापक गोपाल सापकोटा र बाँकोट आधारभूत विद्यालय अन्नपूर्णका प्रधानाध्यापक महेश न्यौपाने सम्मानित बने ।

रतन पाण्डे माविका विद्यालय व्यवस्थापन समिति अध्यक्ष शरदचन्द्र बराल, शिशु कल्याण माविका विव्यस अध्यक्ष श्रीभद्र बराल, सहिद स्मृति माविका शिक्षक मधुविलास न्यौपाने, सीताराम माविका शिक्षक सुरेन्द्र बराल, लिटिल फ्लावर बोर्डिङ स्कुलका शिक्षक शम्भुप्रसाद अधिकारी र सरस्वती टीका माविका लेखापाल रमेश कार्कीलाई पनि सो अवसरमा सम्मान गरिएको छ ।

नेपाल सरकारका पूर्व शिक्षामन्त्री दीनानाथ शर्माले उनीहरूलाई सम्मान गरेका हुन् । शर्माले नेपालको शिक्षा मन्त्रालय नै विदेशी पैसाबाट चलेको दाबी गरे । ‘उनीहरूको पैसामा हाम्रो देश पढाउन लगाउने कुरा पनि भएन । हाम्रो पाठ्यक्रममा देश पढाउने स्थिति छैन,’ उनले भने, ‘उनीहरूकै निर्देशनअनुसार बनेका पाठ्यक्रम अनुसारको पढाइले विदेशीका लागि जनशक्ति तयार भएका छन् ।’

आफू शिक्षामन्त्री हुँदा शिक्षा ऐन तयार पारेर मन्त्री परिषद्बाट पास गरी राष्ट्रपतिकहाँ लैजाँदा कांग्रेस– एमालेका संघ/संगठनले नमानेको भन्दै राष्ट्रपतिले लालमोहर नलगाउको उनले दाबी गरे । शर्माले भने, ‘त्यो ऐन पारित भएको भए नेपाली शिक्षा धेरै अघि बढ्ने थियो ।’ उनले नेपालको माटो पढाउने शिक्षा दिनुपर्नेमा जोड दिँदै शैक्षिक क्षेत्रमा गुणात्मक परिवर्तनको खाँचो औँल्याए ।

शिक्षकहरू स्वच्छ र निष्कलङ्क छवि भएका व्यक्ति भएको बताउँदै नेकपा (माओवादी केन्द्र) का सचिवसमेत रहेका शर्माले सबैभन्दा पवित्र कर्म नै शिक्षण भएको बताए । राष्ट्रका सच्चा सेवक र क्रान्तिका बाहक शिक्षक नै भएको उनको भनाइ थियो । उनले अबको १० वर्षभित्र समाजवादी क्रान्तिको अनुहार देख्न पाउने विश्वास व्यक्त गरे ।

शिक्षकका साथमा विद्यार्थी, अभिभावक र सिंगो समाज रहने बताउँदै शर्माले शिक्षकले ठिक ढङ्गले विद्यार्थीलाई पढाए समाज परिवर्तनको बाटोमा जान सक्ने बताए । उनले शिक्षकहरूसँग माटो र क्रान्तिकारी आशावादी विचार पढाउन आग्रह गरे । शिक्षक राजनीतिक दलले बनाएका नभई राजनीतिक नेता बनाउने नै शिक्षक भएको भन्दै शर्माले देशका इमानदार र असल बाहक शिक्षक भएको विचार राखे ।

कार्यक्रमका अध्यक्ष तथा संगठनका जिल्ला अध्यक्ष महेन्द्रमणि पौडेलले शिक्षकका समस्या हिजोभन्दा आज बढ्नुको कारण खोजी गर्नुपर्ने बेला आएको धारणा राखे । हाम्राभन्दा राम्रा प्रधानाध्यापक, शिक्षक, अध्यक्ष र कर्मचारीलाई सम्मान गरिएको जानकारी दिँदै पौडेलले शिक्षकले आफूले काम गरेका विद्यालयमा उत्कृष्ट कार्य सम्पादन गर्नुपर्नेमा जोड दिए ।

राज्यले कम्तीमा पनि न्यूनतम दरबन्दी दिनुपर्ने माग गर्दै उनले शिक्षामा कम्तीमा २० प्रतिशत लगानी हुनुपर्ने उनको विचार छ । संघीय शिक्षा ऐन जारी गरेर शैक्षिक समस्याहरूको समाधान गर्नुपर्ने उनको माग थियो ।

कार्यक्रममा संगठनका निवर्तमान जिल्ला अध्यक्ष तारानाथ पौडेल, बराह माविका विद्यालय व्यवस्थापन समितिका अध्यक्ष पवन रोका, पत्रकार कोमलनाथ बराल, गण्डकी प्रदेशका शिक्षक संगठनका फ्य्राक्स इन्चार्ज मित्रशरण शर्मा, कास्कीका शिक्षक संगठनका फ्य्राक्सन इन्चार्ज विश्वप्रकाश लामिछाने, पूर्व अध्यक्ष गोपालमणि लामिछाने, शोभा तमु, शिवभक्त देवकोटा, सम्मानित व्यक्तिहरूको तर्फबाट रुपिन्द्र प्रभावी, सचिव सचिन सुवेदी, उपाध्यक्ष प्रकाश रिजाल लगायतले बोलेका थिए ।

प्रथम जिल्ला परिषद्ले जिल्ला समन्वय समिति अध्यक्ष महेन्द्रमणि पौडेलको संयोजकत्वमा ४९ सदस्यीय जिल्ला परिषद् गठन गरेको छ ।