पोखरा । पोखरा १६ बाटुलेचौरमा रहेको प्रगति माध्यमिक विद्यालयले ३५ औं वार्षिकोत्सव फरक ढंगले मनाउने भएको छ । वार्षिकोत्सवको अवसरमा यही माघ २४ र २५ गते ‘प्रगति नाटक महोत्सव’ सहितका कार्यक्रम हुने शुक्रबार आयोजित पत्रकार सम्मेलनमा जानकारी दिइयो ।

महोत्सवमा विद्यार्थीले ५ वटा नाटक मञ्चन गर्ने स्कुलका सूचना अधिकारी जयराम पौडेलले बताए । पोखरा थिएटरको सहकार्यमा हुने महोत्सव सबैजसो विद्यार्थी हेर्न पाउने गरी नाटकहरु धेरै पटक मञ्चन गर्ने तयारी छ । सरुभक्तको नाटक ज्यानमाया परिवर्तनले निर्देशन गरेका छन् ।

सरुभक्तकै अर्काे नाटक भ भ भ भूत मीना भण्डारीको निर्देशनमा विद्यार्थीले मञ्चन गर्दै छन् । महोत्सवमा तीर्थ श्रेष्ठको आमा कविता नाटक रमेशबाबु तिमिल्सिनाको निर्देशनमा मञ्चन गरिँदै छ ।

टंक चौलागाईको रोल न. ४ नाटक धनकाजी श्रेष्ठले निर्देशन गरेका छन् भने अर्काे नाटक तुलना परिवर्तनको निर्देशनमा विद्यार्थीहरुले प्रदर्शन गर्दै छन् ।

कार्यक्रममा प्राडा रामचन्द्र पोखरेल र परिवर्तनले रंगमञ्चबारे बहस गर्ने छन् भने प्रतीक पौडेलबाट कुशल अभिभावकत्व कला र विद्यार्थी जागरणबारे प्रकाश पारिने छ । शिव संकल्पबाट पुस्तक किन र कसरी पढ्नेबारे प्रवचन दिने कार्यक्रमका साथमा कला प्रदर्शनी, फुड स्टल, पुस्तक र शैक्षिक प्रदर्शनीसमेत हुने विद्यालयका प्राचार्य महेन्द्र थापाले बताए ।