पोखरा ।

पोखराको पृथ्वीनारायण क्याम्पसमा स्वतन्त्र विद्यार्थी युनियन (स्व वियु) निर्वाचनको मतगणना सुरु भएको छ।

सोमबार बिहान ९ बजेबाट मतगणना सुरु गरिएकाे निर्वाचन अधिकृत प्राडा रामचन्द्र पोखरेलले जानकारी दिए ।

आइतबार साँझ बसेको सर्वदलीय बैठकको निर्णयअनुसार क्याम्पसभित्रै गणना सुरु भएको छ। मंगलबार दिउँसो १२ बजेसम्म मतगणना सम्पन्न गरिने उनले बताए ।

आइतबार भएकाे मतदानमा २ हजार ८ सय ९७ जना सहभागी थिए । स्ववियु सभापति पदका लागि ८ जना प्रतिस्पर्धी छन्।

अनेरास्ववियुबाट विष्णु पोखरेल, नेपाल विद्यार्थी संघबाट सुशील न्यौपाने, अखिल क्रान्तिकारीबाट नवीन अधिकारी, अनेरास्ववियु समाजवादी, अखिल समाजवादी र अखिल क्रान्तिकारी (वैद्य)को संयुक्त प्यानलबाट सन्तोष पौडेल, अखिल छैटौँबाट मिलन सुनार, प्राज्ञिक विद्यार्थी परिषद्बाट दिप्सन गुरुङ, स्वतन्त्र उम्मेदवारका रुपमा कमल सुवेदी र विप्लवी न्यौपाने चुनावी मैदानमा छन्।