लेखनाथ । पोखरा महानगरपालिका वडा नं. २६ ले एसइर्ई दिएर बसेका विद्यार्थीका लागि डिजिटल प्रविधिमा आधारित तालिमको शुक्रबार देखी शुभारंभ भएको छ ।

तालिम शुभारंभ गर्दै, वडा नं. २६ का अध्यक्ष नरेन्द्र थापाले पछिल्लो पुस्तालाई डिजिटल प्रविधिमा अभ्यस्त गराउन तालिम सहयोगी हुने बताए ।

तालिमले विद्यार्थीलाई पढ्दै कमाउँदै गर्नको लागि पनि थप सहयोग पुग्ने उल्लेख गर्दै, अध्यक्ष थापाले डिजिटल प्रविधिको सिकाई जीवन उपयोगी हुने समेत बताए ।

भिडियो सम्पादन, विषयबस्तुको खोजी र चयन एवं ग्राफिक्स डिजाईनको तालिमले एसइर्ईको नतिजा पछिको अध्ययनलाई समेत थप टेवा पुग्ने उनले उल्लेख गरे ।

अध्यक्ष थापाले सामाजिक सञ्जाल र नयाँ सञ्चार माध्यमको विकास भइरहेको अवस्थामा तालिमपछि आय आर्जनसँग पनि जोडिने गरी शिप सिक्न प्रशिक्षार्थीलाई आग्रह गरे । उनले वडाले पढ्दै कमाउँदै र बुक फ्रि डे जस्ता विद्यार्थी लक्षित कार्यक्रम बनाएको जानकारी दिदै त्यसलाई शिप विकाससँग जोड्दै लगिने स्पष्ट पो ।

कार्यक्रममा शिक्षाविद् रविराज बरालले परिक्षा पछिको फुर्सदको समय के गर्ने भन्ने निर्णय गर्न नसकेका विद्यार्थीका लागि उचित समयमा तालिम प्रदान गरिएको बताए ।

उनले बृज कोर्षको नाउँमा विद्यार्थीहरुले महङ्गो शुल्क तिर्ने गरेको उल्लेख गर्दै, शिप विकास हुने तालिमको आयोजना गरेर वडाले स्थानीय सरकार हुनुको अनुभूति दिलाएको बताए ।

वडा सदस्य तिर्थबहादुर राजभाटको अध्यक्षतामा भएको तालिम शुभारंभ कार्यक्रममा वडा नं. २६ का वडा सचिव लिलामणि भण्डारी, सूचना अधिकारी नवराज सापकोटा तालिम सहयोगी संस्था आकारका इन्जिनियर सन्दिप पौडेल लगायतले सामाजिक संजाल सहितको डिजिटल प्रविधिको ठूलो बजार रहेको उल्लेख गर्दै, त्यसको सदुपयोग गर्न आग्रह गरे ।

भिडियो सम्पादन, ग्राफिक्स डिजाईन, कन्टेन क्रियशन, व्यक्तित्व विकास, प्रोग्रामिङ एण्ड रोवटिक्स सहितको तालिममा वडा नं. २६ का ७० बालबालिकाको सहभागिता छ ।