पोखरा ।
विद्यार्थीहरुको वित्तीय व्यवस्थापन तथा नेतृत्वगत क्षमता अभिवृद्धि गर्ने उद्देश्य राखी इन्ट्रयाक्ट क्लब अफ सगरमाथा मिडटाउनले आयोजना गरेको इनर्जाइजिङ द युथ प्रोग्राम पोखरा सभागृह हलमा भएको छ ।

प्रमुख प्रशिक्षक नेपालका उत्कृष्ट बैंकर अनिल केशरी शाह रहेको यस कार्यक्रममा सगरमाथा विद्यालयका कक्षा ११ र १२ मा अध्ययनरत विद्यार्थीहरु सहभागी थिए ।

कार्यक्रममा प्रमुख प्रशिक्षक शाहले अर्थ, व्यापार र व्यवस्थापनसँग सम्बन्धित थुप्रै विषयमा युवाहरुको भूमिका कसरी रहन सक्छ ? भन्ने विषयलाई स्पष्ट रुपमा प्रस्तुत गरेका थिए ।

विद्यार्थीहरुले कसरी देशको विकासमा युवाहरुको सहभागिता रहन्छ ? द्रुत आर्थिक वृद्धिदर हासिल गर्न के गर्नुपर्ला ? मुद्रा सञ्चितिलाई कसरी बलियो बनाउन सकिएला ? जस्ता थुप्रै प्रश्नहरु गरेका थिए ।

कक्षा –१२ मा अध्ययनरत छात्र समीर रानाभाटको अध्यक्षतामा सम्पन्न भएको कार्यक्रम विद्यार्थीहरु मदिना पौडेल र दर्शन गुरुङले सञ्चालन गरेका थिए ।