काठमाडौं ।

नेकपा (एमाले)का अध्यक्ष केपी शर्मा ओलीले प्रधानमन्त्री बन्न दाबी पेश गरेका छन्। नेपाली कांग्रेस लगायत दलको समर्थनमा ओलीले शुक्रबार साँझ राष्ट्रपति कार्यालयमा दाबी पेश गरेका हुन्। प्रधानमन्त्री बनाउने प्रस्ताव लिएर ओली, कांग्रेस सभापति शेरबहादुर देउवा लगायत नेताहरू शीतल निवास पुगेका थिए।

शीतल निवास स्रोतका अनुसार आइतबार प्रधानमन्त्रीमा ओली नियुक्ति हुनेछन् भने साँझ शपथग्रहण हुनेछ । शपथसँगै कांग्रेस–एमालेले सानो मन्त्रिपरिषद् विस्तारको तयारी गरेका छन् ।

राष्ट्रपति रामचन्द्र पौडेलले संविधानको धारा ७६(२) अनुसार दुई वा दुईभन्दा बढी दलको समर्थनमा सरकार गठनका लागि आह्वान गरेका थिए। राष्ट्रपतिले असार ३० गते साँझ ५ बजेभित्र दाबी पेश गर्न आह्वान गरेका थिए। 

प्रधानमन्त्री पुष्पकमल दाहालले शुक्रबार प्रतिनिधि सभाबाट विश्वासको मत गुमाएकै दिन राष्ट्रपतिले नयाँ सरकार गठनका लागि आह्वान गरेका हुन्।

प्रतिनिधि सभाको सबैभन्दा ठूलो दल कांग्रेस र एमालेले असार १७ गते आलोपालो सरकारको नेतृत्व गर्ने सहमति गरेपछि एमाले सरकारबाट बाहिरिएको थियो।

कामचलाउ हैसियतमा रहेका प्रधानमन्त्री पुष्पकमल दाहाल भने शुक्रबार नै प्रधानमन्त्रीको सरकारी निवास बालुवाटार छाडेर खुमलटार सरेका छन् । राष्ट्रपति पौडेलले सरकार निर्माणका लागि तीन दिनको समयसीमा तोकेर दाबी पेस गर्न आह्वान गरेपछि कांग्रेस र एमालेका बहुमत सांसदको हस्ताक्षरसहित ओली सहयोगी दलका नेतासहित प्रधानमन्त्रीको दाबी पेस गर्न सवा ९ बजे शीतल निवास पुगेका गरेका थिए ।