बुधबार, ११ बैशाख २०७६
samadhannews
ntc

रङ, संगीत र पर्यटकसँग रेवानकाे होली

सोमबार, ०४ चैत २०७५
2 पटक पढिएको

समाधान संवाददाता

रेस्टुरेन्ट तथा बार एसोसियसन -रेबान- पोखराले होलीको छेको पारेर महोत्सव गर्दै आएको छ । होलीको समयमा पोखरा आएका स्वदेशी तथा विदेशी पर्यटकसँग यसरी रङको पर्व मनाउन थालेको १३ औं वर्ष भइसकेको छ ।

फागु पुर्णिमाले चिनिएको होली पर्व यसवर्ष चैत ६ गते संस्थाले पर्यटकसँग धुमधामले महोत्सव गर्ने तयारीमा छ । संस्थाले होलीमा आत्मीयताको रङमात्रै खेलाउँदैन, पञ्जेबाजा बजाएरै रमाइलो गर्ने वातावरण मिलाउँछ । यसपटकको होलीमा पनि बाजागाजासहित पर्यटकसँग होली खेल्न महोत्सव आयोजना गर्न लागेको आइतबार संस्थाले पत्रकार सम्मेलनमार्फत जानकारी दिएको छ ।

‘स्वदेशी तथा विदेशी पर्यटकलाई सामूहिक होली खेल्ने व्यवस्था मिलाएका छौं,’ संस्थाका अध्यक्ष लक्ष्मण बरालले भने, ‘यसले हाम्रो पुरानो संस्कृति तथा परम्पराबारे समेत पर्यटकलाई जानकारी हुन्छ ।’ उनले बुधबार बिहान ११ बजेदेखि पञ्चेबाजासहित होली महोत्सव ¥याली सुरु हुने जानकारी दिए ।

संस्थाले होली महोत्सव लेकसाइड केन्द्रित गरेको छ । अम्मट चौताराबाट सुरु हुने होली र्‍याली गौरीघाट, बाराहीचौक, हल्लनचौक हुँदै खहरेचौकसम्म होली मनाउने योजनामा रहेको संस्थाका महासचिव गणेशबहादुर थापाले जानकारी दिए ।

होलीकै अवसरमा पोखरा सांगीतिक कलाकार संघले समेत सांगीतिक प्रस्तुति दिने भएको छ । नयाँ, पुराना ब्यान्ड तथा कलारसँग यो वर्षको होली मनाउने तयारीमा संस्था लागेको अध्यक्ष सुनिल थापाले जानकारी दिए । बुधबार ११ बजेदेखि सुरु हुने ‘पोखरा होली म्युुजिक फेस्टिबल’मा विभिन्न आधादर्जन ब्यान्ड तथा कलाकारले प्रस्तुति दिनेछन् ।

कार्यक्रममा कन्दरा ब्यान्ड, डिमर्चा ब्यान्ड, देउराली ब्यान्ड, लेकाली ब्यान्ड, विनोद बानिया, भाइ गुरुङ, प्राप्ती तुलाचन, आनन्दराज बज्रचार्य, सागर साहलगायत कलाकारको प्रस्तुति छ । कार्यक्रममा प्रचारप्रसार समिति संयोजक विनोद बानियाले ११ देखि २ बजेसम्म डिजेइङ र त्यसपछि कलाकार तथा ब्यान्डको एकल प्रस्तुति रहने जानकारी दिए ।

कार्यक्रम पश्चात बजेको रकम कलाकारकै हितमा अक्षय कोष स्थापना गरिने संस्थाका अध्यक्ष सुनिल थापाले जानकारी दिए । ‘वास्तविक कलाकारले भन्दा पनि पहुँचको कलाकारको सम्मान हुने स्थिति छ । बाँकी कलाकारले बिरामी हुँदा पनि उपचार खर्च जुटाउन नसक्ने अवस्था छ,’ उनले भने, ‘कार्यक्रम पश्चात उठेको रकम उनीहरुकै उपचारका लागि अक्षयकोष स्थापना गर्नेछौं ।’

कार्यक्रम लेकसाइड हल्लनचौकस्थित क्याम्पिङ चौरमा हुनेछ । संस्थाले होलीको रमाइलोसँगै सांस्कृतिक पर्यटन प्रवद्र्धन कार्यक्रमबाट हुने अपेक्षा राखेको छ । संस्थाका अध्यक्ष थापाले भने, ‘सांस्कृतिक प्रर्वद्धन पनि हुन्छ । अर्कातिर पोखरेली कलाकारको हकहितमा पनि सहयोग पुग्छ ।’ कार्यक्रबाट १४ लाख संकलन गरी ८ लाख बचत गर्ने लक्ष्य राखिएको आयोजकले जनाएको छ ।

सम्बन्धित खबर