शनिबार, १६ साउन २०७८
samadhannews
Sanima Bank New year offer

मुस्ताङमा पहिलो पटक स्याउ जोन घोषणा, स्याउ जोनका लागि ५१ जनाको आवेदन

शनिबार, १६ चैत २०७५

मुस्ताङ, सुन्दरकुमार थकाली

स्याउ जोन मुस्ताङमा सूचीचकृत हुन ५१ जना किसानले आवेदन दिएका छन् । प्रधानमन्त्री कृषि आधुनिकीकरण परियोजना कार्यान्वयन इकाइ अन्तर्गत मुस्ताङमा पहिलो पटक स्याउ जोन घोषणा गरिएको हो ।

परियोजना कार्यान्वयन इकाइ स्याउ जोन कार्यालयले जिल्लाका ५ वटै स्थानीय तहका किसानलाई जोनमा सूचीकृत हुन गत पुसमा सूचनामार्फत आवेदन माग गरेको थियो । चालु वर्ष स्याउ जोन कार्यक्रममा सूचीकृत हुन पाऊँ भनी आवेदन दिनेमा सबैभन्दा बढी घरपझोङ गाउँपालिकाका किसान छन् भने लोमान्थाङ गाउँपालिकाबाट आवदेन परेन ।

घरपझोङबाट ३१, वारागुङबाट ८, थासाङ ८ बाट र लोघेकर दामोदरकुण्डबाट ४ आवेदन परेको परियोजना कार्यान्वयन इकाइका कृषि अधिकृत शिवपुजन गुप्ताले जानकारी दिए । उनले चालु वर्ष ५१ जनाले जोनमा सूचीकृत हुन आवेदन दिएको जानकारी दिँदै छुटेकालाई आगामी आर्थिक वर्षको कार्यक्रममा समावेश गरिने बताए ।

मुस्ताङमा स्याउ जोनमा सूचीकृत गर्ने कार्यसँगै परियोजनाको कार्यक्रमलाई प्रभावकारी रुपमा अघि बढाउन स्याउ जोन सञ्चालक समितिसमेत गठन भएको छ । समितिमा सबै स्थानीय तहको प्रतिनिधित्व गराइएको कार्यालयले जनाएको छ । घरपझोङ निवासी जयन्द्रलाल थकालीको अध्यक्षतामा ९ सदस्यीय स्याउ जोन कार्य समिति गठन भएको छ ।

उपाध्यक्ष कमला लालचन अधिकारी, सचिव विष्णु थकाली, सहसचिव विनोद थकाली छन् । सदस्यहरु सरीता विक, सोजन हिराचन, कुङ्गा तेन्जिङ गुरुङ, लाक्पाटसी गुरुङ र पासाङ गुरुङ छन् ।

स्याउ जोन विस्तारका लागि साना सिँचाइ पूर्वाधार कार्यक्रम अन्तर्गत संघीय सरकारबाट १५ लाख बजेट विनियोजन भएको हो । परियोजना कार्यान्वयन इकाइ मुस्ताङका लागि चालु वर्ष पोस्ट हार्भेस्ट सेन्टर र कस्टम हायरिङ सेन्टरका लागि उक्त रकम विनियोजन भएको अधिकृत गुप्ताले जनाए । समितिलाई जिल्लाका जोन सूचीकृत किसानलाई आवश्यक पर्ने सामग्री तथा औजार खरिदका लागि किसान छनोटको जिम्मेवारी दिइएकोे गुप्ताले बताए ।

चालु वर्षकै कार्यक्रम अन्तर्गत स्याउ जोन समितिलाई मागमा आधारित अर्को लाख बजेट विनियोजन भएको हो । जोनमा आवद्ध किसानले पोस्ट हार्भेस्ट सेन्टर स्थापनाका लागि सम्बन्धित र जोन व्यावसायीकरणका लागि प्रशोधन केन्द,्र गोदाम घर, ग्रेडिङ, तौल यन्त्र, प्रिन्टिङ, प्याकेजिङ, लेबलिङ, ढुवानी र बिक्री कक्ष पूर्वाधारका साथै उत्पादन उप्रान्त उपज व्यवस्थापन र त्यसका लागि ढुवानी साधन खरिद गर्न सकिने कार्यसूचीमा उल्लेख छ । सूचीकृत किसानले उल्लेखित सामग्री खरिदका लागि ८५ प्रतिशत अनुदान पाउने व्यवस्था छ ।

कृषि यान्त्रिकीकरण (कस्टम हायरिङ) सामग्री खरिदका लागि सूचीकृत किसानले ५० प्रतिशत अनुदान पाउनेछन् । स्याउ उत्पादनदेखि भण्डारसम्म किसानलाई आवश्यक पर्ने मेसिनरी औजार तथा उपकरण खरिदमा अनुदान प्राप्त हुने कार्यालयले जनाएको छ । मागमा आधारित ६ लाख रुपैयाँ स्याउमा लाग्ने विभिन्न संक्रमण नियन्त्रणका लागि छुट्याइएको छ । प्रकोप नियन्त्रणका लागि नीलोतुथो, चुना, जैविक विषादी र सर्वो आयल लगायतका औषधी खरिदमा खर्च हुने कार्यालयले जनाएको छ ।

प्रधानमन्त्री कृषि आधुनिकीकरण परियोजना कार्यान्वयन इकाइका अनुसार ५ सय हेक्टरमा गरिने स्याउ खेतीलाई जोनमा सूचीकृत गरेको हो । यसअघि परियोजनाले सुरु गरेको स्याउ पकेट र ब्लक जस्ता साना कार्यक्रम कृषि ज्ञान केन्द्र इकाइमार्फत संञ्चालन हुने कृषि अधिकृत गुप्ताले जानकारी दिए । मुस्ताङमा गतवर्ष १२ सय हेक्टरमा स्याउ खेती भएकोमा यसवर्ष ५७ हेक्टर थप जमीनमा स्याउ खेती भएको गुप्ताले बताए । यो वर्ष घरपझोङमा २५ सय र वारागुङमा साढे १४ हजार स्याउका बेर्ना लगाइएको हो । चालुवर्ष ५ हजार ८ सय टन स्याउ उत्पादन भएको थियो । मुस्ताङमा १ हजार २ सय ५७ हेक्टरमा स्याउ लगाइए पनि ४ सय ५० हेक्टरमा मात्र स्याउको उत्पादन भइरहेको कृषि अधिकृत गुप्ताले जानकारी दिए ।

सम्बन्धित खबर