शुक्रबार, ०६ भदौ २०७६
samadhannews
कन्दराले ल्यायो ‘चन्द्रकोटकी नानी’

कन्दराले ल्यायो ‘चन्द्रकोटकी नानी’

आइतबार, ०८ बैशाख २०७६
590 पटक पढिएको

समाधान संवाददाता
पोखरा

नेपालमै चर्चित पोखराको ब्यान्ड ‘कन्दरा’ ले नयाँ गीत ‘चन्द्रकोटकी नानी’ बजारमा ल्याएको छ । म्युजिक नेपालको अफिसियल युटुबबाट शुक्रबार सार्वजनिक गरिएको गीतमा एलिसा राई फिचरिङमा छिन् ।

गीतकार स्व.विनोद गौचनको शब्दमा रहेको गीतलाई ब्यान्डकै सदस्य संगीतकार सुनील थापाले संगीत भरेका छन् भने स्वर विवेक श्रेष्ठकोे छ । कन्दराका तिमी पारी, लेककी हे माया, तगारोमा रुमाल राखी, हङकङ पोखरा, भेडीगोठैमा लगायतका दर्जनौं हिट भएका छन् ।

गीतमा गाउँ परिवेशमा बोलिने टिपिकल शब्दलाई प्रस्तुत गरिएको पाइन्छ । वीरेठाँटी गाउँसहित मोदी नदीको वर्णन गरिएको छ । काठमाडौंको चन्द्रकोटको सेरोफेरोमा रहेर छायांकन गरिएको गीतको म्युजिक भिडियोलाई प्रशन्न पौडेलले निर्देशन गरेका हुन् । मोहित मुनालले संगीत संयोजन गरेको गीतको म्युजिक भिडियोलाई विदुर पाण्डेले खिचेका हुन् । टेकेन्द्र शाहको सम्पादन रहेको गीतमा विवेक श्रेष्ठ एलिसाको अपोजिटमा देखिएका छन् ।

पोखरा, माछापुच्छ्रे र कन्दरा एकअर्काका परिपूरक भएको गायक विवेक श्रेष्ठले बताए । विगत २७ वर्ष देखि आफ्ना गीतमार्फत् पोखरा, माछापुच्छ्रे र समस्त नेपाललाई विश्वमा चर्चित बनाउन ब्यान्डले उल्लेखनीय भूमिका खेलेको श्रेष्ठ बताउँछन् ।

चन्द्रकोटकी नानी पनि यसैको निरन्तरता भएको उनको भनाइ छ । स्वर्गीय गीतकार गौचनले आफ्ना सहपाठसँग अक्षर यात्राको क्रममा पोखरा आसपासका गाउँ घुम्दा, चन्द्रकोटको सेरोफेरोमा लेखिएको गीत नै ‘चन्द्रकोटकी नानी’ भएको श्रेष्ठले बताए । उनका अनुसार ब्यान्डले लोकपप शैलीमा गीतलाई जीवन्त बनाउने प्रयास गरेको छ ।

सम्बन्धित खबर