मङ्गलबार, ३१ भदौ २०७६
samadhannews
व्यक्तिले दर्ता गरेको करोडौंको जग्गा सार्वजनिक ठहर

व्यक्तिले दर्ता गरेको करोडौंको जग्गा सार्वजनिक ठहर

बिहिबार, ०९ जेठ २०७६
1940 पटक पढिएको

समाधान संवाददाता, पोखरा

व्यक्तिले दर्ता गरेको पोखरा २९ स्थित गडुवाखोलानजिकको १५ रोपनी जमिन सर्वाेच्च अदालतले सार्वजनिक ठहर गरिदिएको छ । कम्तीमा पनि २ करोड रोपनीको हिसाब राख्दामात्रै उक्त जमिन ३० करोड रुपैयाँको हो । तर चलनचल्तीमा भने गडुवाखोला छेउको त्यो जमिनलाई आधा अर्ब रुपैयाँ रुपैयाँ पर्ने स्थानीय बताउँछन् ।

तत्कालीन पुनरावेदन अदालत पोखराले गरेको फैसलालाई नै सर्वाेच्चका न्यायाधीशद्वय सपना मल्ल प्रधान र डा. मनोजकुमार शर्माको इजलासले मंगलबार सदर गरेको हो । पोखरा ३३ की मीनकुमारी अधिकारीसहित ६ जनाले पुनरावेदन अदालतको फैसला विरुद्ध सर्वाेच्चमा २०७० साल साउन १ गते मुद्दा हालेका थिए । उक्त मुद्दामा मंगलबार सर्वाेच्चमा पोखरा महानगरपालिकाको पक्षबाट वरिष्ठ अधिवक्ता हरिहर दाहाल र अधिवक्ता खगेन्द्र आचार्यले बहस गरेका थिए । मीनकुमारसमेतका तर्फबाट वरिष्ठ अधिवक्ता वसन्तराम भण्डारी र अधिवक्ता विश्व सिग्देलले बहस गरेका थिए ।

पोखरा महानगरपालिकाका वरिष्ठ कानुन अधिकृत नारायण शर्माका अनुसार २०६५ साल असार १९ गते मीनकुमारी अधिकारी र पूर्णदीप पौडेलले क्रमश १२ र २ रोपनी केही आना गरी जमिन आफ्नो नाममा दर्ता गरेका थिए । तर उनीहरुले दर्ता गराएको जमिन सार्वजनिक हुनुपर्छ भनी स्थानीय चोलाप्रसाद बराल, ईश्वर गुरुङ र रामजी पौडेलले २०६५ सालको भदौमा मुद्दा हालेका थिए । २०६८ जेठ २३ गते कास्की जिल्ला अदालतका तत्कालीन न्यायाधीश नारायणप्रसाद शर्माको इजलासले उक्त जमिन व्यक्तिकै हुने फैसला सुनाएको थियो ।

जिल्ला अदालतको फैसलाविरुद्ध बराल, पौडेल र गुरुङले तत्कालीन पुनरावेदन अदालत पोखरामा २०६८ सालको भदौमा पुनरावेदन गरेका थिए । पुनरावेदनका न्यायाधीशद्वय विश्वम्भरप्रसाद श्रेष्ठ र डिल्लीराज आचार्यले २०६९ फागुन १३ गते उक्त जमिन सार्वजनिक हुने फैसला गरेका थिए । त्यसविरुद्ध मीनकुमारीसहित ६ जना २०७० साल साउन १ गते सर्वाेच्च अदालत पुगेका हुन् । सर्वाेच्चले मंगलबार पुनरावेदनकै फैसला सदर गरेको हो । सर्वाेच्चबाट अत्यन्तै न्यायपूर्ण फैसला आएको अधिवक्ता खगेन्द्र आचार्यले बताए ।

सर्वाेच्चले सार्वजनिक हुने भनेको जमिन साविक शिशुवा गाउँपञ्चायतको वडा नम्बर २ को कित्ता नम्बर ५४३ को जमिन हो । गडुवाखोलाको पूर्वमा उक्त जमिन छ । खोलाको पश्चिमपट्टि कित्ता नम्बर ४०६ र ४०७ नम्बरको कित्ताका धनीहरुले पूर्वपट्टिको पनि आफ्नै दाबी गरी दर्ता गराएका थिए । २०३२ सालको फिल्डबुकमा ५४३ नम्बर कित्ताको जमिन पर्ती जनाइएको छ ।

कित्ता नम्बर ४०६ र ४०७ को जमिन मीनकुमारी अधिकारीहरुले २०६५ वैशाख ३० गते निवेदन दिएर दर्ता गराएका थिए । उक्त जमिन दर्ता भएपछि कित्ता नम्बर ५४३चाहिँ छुटेछ भनी जेठ ३० गते निवेदन दिएपछि मालपोतले असार १९ गते दर्ता गरिदिएको थियो ।

आफ्नो नाममा ल्याइसक्नासाथ मीनकुमारीले उक्त जमिन घनश्याम आचार्य, सरस्वती पौडेल, दीननाथ आचार्य, शोभा शर्मा र राधिका भण्डारीलाई बेचेकी थिइन् । पुनरावेदनको फैसलाले जमिन सार्वजनिक भएपछि मीनकुमारीसहितका अरु पनि सर्वाेच्च गुहार्न गएका हुन् ।

सम्बन्धित खबर