मङ्गलबार, १० असार २०७६
samadhannews
e planet education.

मुस्ताङमा ४८८ जनाको आँखा जाँच र ३० जनाकाे माेतियाबिन्दुकाे अप्रेशन निशुल्क

शुक्रबार, १० जेठ २०७६
510 पटक पढिएको

सुन्दरकुमार थकाली
मुस्ताङ

तिलगंगा आँखा प्रतिष्ठान केन्द्र काठमाडौंको आयोजना तथा जिल्ला सामुदायिक आँखा केन्द्र मुस्ताङको समन्वयमा बुधबार जोमसोम अस्पतालमा आँखा शिविर सञ्चालन गरिएको छ । शिविरमा ४ सय ८८ जनाले आँखा जाँच गराएका छन् ।

प्रतिष्ठानले जोमसोममा गरेको पहिलो चरणको आँखा शिविरमा मुस्ताङको तल्लो क्षेत्रका ३ स्थानीय तहका सेवाग्राहीले लाभ लिएको मुस्ताङ सामुदायिक आँखा केन्द्रकी संयोजक रुमिला नेपालीले बताइन् । उनका अनुसार शिविरमा ३० जनाको आँखाको मोतियाबिन्दुको निशुल्क अप्रेशन गरिएको छ । ४ सय ५८ जनाको निशुल्क आँखा परीक्षण भएको बताइन् । उनले आँखाका बिरामी तथा अप्रशेनको सम्पूर्ण खर्च तिलगंगा प्रतिष्ठानले नै व्यहोरेको जानकारी दिइन् ।

संयोजक नेपालीले पहिलो चरणको आँखा शिविरमा उत्साहजनक सहभागिता भएको उल्लेख गरिन् । उपल्लो मुस्ताङको चराङमा दोश्रो चरणको आँखा शिविर शुक्रबार सञ्चालन हुने उनको भनाइ थियो । जोमसोममा भएको आँखा शिविर सञ्चालन गर्न नेपाल रेडक्रस सोसाइटी मुस्ताङ शाखा, जुनियर रेडक्रस र जोमसोम महिला समूहले सहयोग गरेको थियो ।

तिलगंगा आँखा प्रतिष्ठानले मुस्ताङमा बर्सेनि आँखा शिविर सञ्चालन गरेको छ । यसपालि प्रतिष्ठानकी कार्यकारणी अधिकृत एवं वरिष्ठ नेत्र रोग विशेषज्ञ डा. रीता गुरुङसहित ५ जनाको चिकित्सक टोली मुस्ताङ आएको छ ।

तिलगंगा प्रतिष्ठानले दूरदराजका सुगम स्थानमा पुगेर सेवा लिन बञ्चित बिरामीलाई सेवा प्रवाह गर्दै आएको वरिष्ठ नेत्र रोग विशेषज्ञ रीता गुरुङले जानकारी दिइन् । उनका अनुसार प्रतिष्ठानले यसपालि ५ सय जनाको आँखाको शल्यक्रिया गर्ने लक्ष्य लिए पनि पहिलो चरणमा ३० जनाको मात्र शल्यक्रिया गरिएको छ ।

शुक्रबार चराङमा आँखा शिविर हुने प्रतिष्ठान बाह्य कार्यक्रम विभागका नाम्खेन लामाले जानकारी दिए । टोली शिविरका लागि उपल्लो मुस्ताङ प्रस्थान गरेको छ । प्रतिष्ठानले स्थानीय सरोकारवाला निकायको समन्वयमा आँखा शिविर सञ्चालन गर्दै आएको लामाले बताए ।

सम्बन्धित खबर