आइतबार, २९ मङि्सर २०७६
samadhannews
व्यासकाे सुढेगाउँमा पहिलाे पटक बिजुली

व्यासकाे सुढेगाउँमा पहिलाे पटक बिजुली

मङ्गलबार, ०३ असार २०७६
1390 पटक पढिएको

कृष्ण न्यौपाने
दमौली

व्यास नगरपालिका १३ सुढेगाउँमा पहिलो पटक बिजुली बलेको छ । नेपाल विद्युत प्राधिकरण तनहुँ वितरण केन्द्रको ग्रामीण विद्युत कार्यक्रम अन्तर्गत सुढेका १३ घरमा बिजुली पुगेको हो ।

बिजुली नपुगेका घरधुरीमा ९ वटा मिटरमार्फत् विद्युत सेवा पुर्‍याइएको वितरण केन्द्रका प्रमुख शिव गोशलीले बताए ।१५ केभीएको तारमार्फत् विद्युत विस्तार गरिएको छ । उनले भने, ‘अहिलेसम्म अन्धकारमा रहेको सुढेमा विद्युत विस्तारका लागि १५ लाख रुपैयाँ लगानी भएको छ ।’ गोशलीले डेढ वर्षभित्र विद्युत नपुगेका सबै ठाउँमा विद्युत पुर्‍याउने लक्ष्यका साथ काम गरिरहेको बताए ।

व्यास नगरपालिकामा नाल्दीघाटमा मात्रै अब विद्युत विस्तार गर्न बाँकी छ । गोशलीका अनुसार नाल्दीघाटको २५ घरधुरीमा आगामी आर्थिक वर्षमा विद्युत विस्तार हुनेछ । उनले भने, ‘सुढेबाट ६ किमी टाढा रहेको गाउँमा विद्युत विस्तारका लागि पहल भइरहेको छ । आगामी वर्षसम्म उक्त गाउँमा बिजुली बल्नेछ ।’ पहिलो पटक बिजुली बल्दा सुढेका स्थानीयमा खुसीयाली छाएको छ ।

तनहुँका १५ प्रतिशत स्थानीय अझै पनि अँध्यारोमा बस्न बाध्य छन् । रिसिङ गाउँपालिका २ दुवुङको १ सय २०, खाल्टुभन्ज्याङका १ सय २०, रिसिङ गाउँपालिका ४ गुम्लेकका ६० घरधुरीमा चालु आर्थिक वर्षभित्रै विद्युत पुर्‍याउने लक्ष्य छ । विद्युतीकरणका लागि बन्दीपुरको साराङघाटमा ८ एमबिएको सबस्टेसन निर्माण भइरहेको छ । यो सबस्टेसनबाट आँबुखैरेनीसम्म १९ किमी लाइन तानेर आँबुखैरेनीका विद्युत नपुगेका गाउँमा विद्युत सेवा पुर्‍याइनेछ ।

सोही सबस्टेसनबाट नयाँ फिडर निकालेर देवघाट गाउँपालिकाका कोटा, वैदी, छिपछिपे लगायत ग्रामीण बस्तीमा बिजुली पुर्‍याइने केन्द्रले जनाएको छ । बुद्धसिं फिडरमार्फत आँबुखैरेनी गाउँपालिका ५ र ६, बन्दीपुर गाउँपालिका ६ खहरे, व्यास नगरपालिका १४ नाल्दीघाट लगायत बुद्धसिं मार्गका छेउछाउका वस्तीमा विद्युतीकरण गरिने गोशलीले जानकारी दिए । विद्युतीकरणका लागि घिरिङ र खैरेनीटारमा ८÷८ एमबिएको सबस्टेसन निर्माणाधीन छ । केन्द्रले २ वर्षभित्र सबै काठे पोल विस्थापन गर्ने अभियानलाई तीव्रता दिएको छ भने भोल्टेज नपुगेको, बस्ती विस्तार भएका ठाउँमा ट्रान्सफर्मर थप गरिरहेको छ ।

सम्बन्धित खबर