बुधबार, २१ जेठ २०७७
samadhannews
nepal telecome

‘मदन भण्डारी साँझ’ असार १३ मा

बुधबार, ०४ असार २०७६
1400 पटक पढिएको

समाधान संवाददाता
पोखरा

जननेता मदन भण्डारीको ६७ औं जन्म जयन्तीका अवसरमा मदन भण्डारी फाउन्डेसन कास्कीले मदन भण्डारी साँझ गर्न लागेको छ । मदन भण्डारीका दर्शन, विचार र योगदानलाई जनतामाझ पुर्‍याउने उद्देश्यले स्थापित फाउन्डेसनले असार १३ गते पोखरा उद्योग वाणिज्य संघको सभाहलमा कार्यक्रम गर्न लागेको हो ।

प्रतिष्ठान कास्कीका अध्यक्ष माधव बास्तोलाले कार्यक्रममा लोकदोहोरी एवं हाँस्य कलाकार र नृत्य प्रस्तुति हुने जानकारी दिए । कार्यक्रममा सांस्कृतिक, आर्थिक, प्राविधिक, खेलकुद र उद्यम गरी ५ विधामा योगदान पुर्‍याएका महानुभावलाई सम्मान गरिने उनले बताए । सम्मान गर्ने व्यक्ति छनोटका लागि पुण्यप्रसाद पौडेलको संयोजकत्वमा दिलीपविक्रम शाही, तेजनारायण अधिकारी सदस्य रहेको समिति समेत गठन भएको छ ।

कार्यक्रममा लोकदोहोरीतर्फ प्रजापति पराजुली, पुरुषोत्तम न्यौपाने, बद्री पंगेनी, तारापति सुवेदी, जीवन दाहाल, शंकरबिरही गुरुङ, सुरेन्द्र गुरुङ, कृष्ण भण्डारी, सरला पाण्डे, लक्ष्मी नेपाली, सविना गुरुङ लगायतको प्रस्तुति रहनेछ । हाँस्य कलाकारतर्फ राजा राजेन्द्र, पुर्खे बा (पुरुषोत्तम भण्डारी) तथा १ खुट्टाले नृत्य प्रदर्शन गर्ने रमा न्यौपानेसहितका स्थानीय तथा राष्ट्रिय स्तरका कलाकारले नृत्य प्रस्तुत गर्ने अध्यक्ष बास्तोलाले जानकारी दिए ।

जिल्ला स्तरीय वक्तृत्वकलामा उत्कृष्ट ३ जनाले मैले चिनेको मदनको विषयमा प्रस्तुति गर्ने कार्यक्रम छ ।

राष्ट्रिय सभाका अध्यक्ष गणेशप्रसाद तिमिल्सिनाको प्रमुख प्रमुख अतिथि रहने समारोहमा गण्डकी प्रदेशका आदिवासी जनजातिका सांस्कृतिक झाँकी, लोकगीत, लोकनृत्यका अलावा भाषा, भेषभूषाको प्रदर्शनी गरिनेछ ।

‘कम्युनिस्ट पार्टी भूमिगत भएका बेला कास्कीका सेल्टरदाता, आन्दोलनका घाइते, अपांग, बेपत्ता तथा सहिद परिवारका व्यक्तिको पहिचान र दस्तावेजीकरण गरिने छ,’ अध्यक्ष बास्तोलाले भने, ‘मदन भण्डारीका बारेमा युवाबीच रचनात्मक कार्यक्रमका साथै महिला उत्पीडितको व्यक्तित्व र नेतृत्व विकासको कार्यक्रम ल्याउने तयारी गरेका छौं ।’ प्रतिष्ठान कास्कीले १ वर्षे कार्ययोजना बनाएर रचनात्मक कार्यक्रम गर्न लागेको उल्लेख गर्दै अध्यक्ष बास्तोलाले प्रशिक्षण तथा स्कुल चलाएर कास्कीका १ हजार जनालाई प्रशिक्षण दिने बताए । उनले कास्कीका १ हजार जनालाई नेतृत्व विकास र स्वरोजगारसम्बन्धी तालिम दिने बताए ।

सम्बन्धित खबर