बिहिबार, ०२ साउन २०७६
samadhannews
e planet education.

एकल महिलाका सन्तानलाई छात्रवृत्ति

आइतबार, ०८ असार २०७६
700 पटक पढिएको

समाधान संवाददाता
पोखरा

आर्थिक अवस्था कमजोर भएका कास्कीका एकल महिलाका सन्तानलाई छात्रवृत्ति दिइएको छ । ९ औं अन्तर्राष्ट्रिय एकल महिला दिवसको सन्दर्भमा मानवअधिकारका लागि महिला एकल महिला समूह कास्कीले सरकारी विद्यालयमा १ देखि १२ कक्षासम्म पढ्दै गरेका एकल महिलाका २० जना छोराछोरीलाई छात्रवृत्ति प्रदान गरिएको हो ।

आर्थिक अवस्था कमजोर रहेका एकल महिलाका सन्तानलाई थोरै भए पनि साथ दिन छात्रवृत्ति दिइएको समूहका कास्की अध्यक्ष जुना केसीले बताइन् । २० जनालाई जनही २ हजार प्रदान गरिएको छ । उनले बालबालिका र कोष सञ्चालनमा सहयोग गर्ने स्कटल्यान्डका विद्यार्थी सुजानी सोले र उनको परिवार र अर्का विद्यार्थी जेम्स बेट्यानीलाई धन्यवाद दिइन् । वर्षेनि छात्रवृत्ति दिनका लागि ४ लाख रुपैयाँको अक्षयकोष स्थापना गरिएको छ ।

समूहका गण्डकी अध्यक्ष प्रमिला तझ्याले एकल महिला दिवस प्रदेशका केही जिल्लामा बिभिन्न कार्यक्रम गरी मनाइने बताइन् । उनले सबै एकल महिलालाई शुभकामना दिँदै छात्रवृत्तिको सदुपयोग गर्न पनि आग्रह गरिन् ।

समूह पोखरा १६ का अध्यक्ष दुर्गा केसीले यस्ता कार्यक्रम सबै वडामा स्थानीय सरकारले सञ्चालन गर्नुपर्ने सुझाव दिइन् । एकल महिला दिवस नेपालमा सन् २०११ बाट मनाउन थालिएको हो । कार्यक्रममा संस्था सचिव विष्णु श्रेष्ठले पनि बोलेकी थिइन् ।

सम्बन्धित खबर