शुक्रबार, ०१ कार्तिक २०७६
samadhannews
bindedswori home decore

गौरीशंकरलाई कास्कीको रनिङ सिल्ड उपाधि

बुधबार, २५ असार २०७६
1390 पटक पढिएको

समाधान संवाददाता
पोखरा

कास्की जिल्ला स्तरीय ११ औं राष्ट्रपति कप रनिङ सिल्ड प्रतियोगिताको उपाधि पोखरा २५ स्थित गौरीशंकर माविले हात पारेको छ । प्रतियोगितामा गौरीशंकरले एथ्लेटिक्सतर्फ ८ स्वर्ण, ३ रजत र ३ कास्य पदक जित्दै उपाधि चुम्न सफल भएको हो । उपाधिसँंगै गौरीशंकरले नगद १२ हजार प्राप्त गरेको छ ।

टप्स मावि दोस्रो स्थानमा रहँदा एथ्लेटिक्सतर्फ ७ स्वर्ण, ५ रजतसहित नगद १२ हजार प्राप्त गर्‍यो ।

कुमुदिनी होम्सले एथ्लेटिक्समा ३ स्वर्ण हात पार्दै ओभरअल तेश्रो स्थानमा रह्यो । कुमुदिनीले नगद ९ हजार प्राप्त गरेको कास्की जिल्ला खेलकुद विकास समिति कार्यालय प्रमुख प्रकाश बरालले जानकारी दिए । रनिङ सिल्ड प्रतियोगितामा कास्कीका ४ गाउँपालिका र पोखरा महानगरपालिकाबाट छनोट भएका खेलाडीलाई मात्र सहभागी गराइएको बरालले बताए ।

प्रतियोगितामा छात्रतर्फ कुमुदिनी होम्सका सागर नेपालीले ट्रयाक एन्ड फिल्डतर्फ व्यक्तिगत ३ स्वर्ण जित्दै उत्कृष्ट खेलाडी घोषित भए । उनलाई नगद ५ हजारसहित सम्मानपत्र प्रदान गरियो । छात्रातर्फ ट्रयाक एन्ड फिल्डतर्फ नै ५ स्वर्णसहित गौरीशंकर माविकी अनीषा भण्डारीले नगद ५ हजार र प्रमाणपत्र प्राप्त गरिन् ।

विजयी विद्यालय र खेलाडीलाई पश्चिमाञ्चल क्षेत्रीय खेलकुद विकास समिति अध्यक्ष सम्पन्न श्रेष्ठ, जिल्ला खेलकुदका कोषाध्यक्ष दीपकबहादुर गोदार, क्षेत्रीय खेलकुदका कार्यालय प्रमुख लक्ष्मणप्रसाद योगी, टप्स माविका संस्थापक रत्नमान गुरुङ, युवा नेता शिव अधिकारीले नगद, सिल्ड, मेडल र प्रमाणपत्र वितरण गरेका थिए ।

प्रतियोगितामा लगभग ४ सय खेलाडी सहभागी थिए । २ दिनसम्म चलेको प्रतियोगितामा एथ्लेटिक्स, तेक्वान्दो, उस्सु, कराँते र टिम गेमतर्फ भलिबल तथा कबड्डी समावेश गरिएको कार्यालय प्रमुख बरालले बताए । रुपा र मादी गाउँपालिकाकाबाट महिला भलिबलमा सहभागी थिए । ४ गाउँपालिका र महानगरपालिकाका पहिलो र दोस्रो हुने खेलाडी तथा टिमलाई मात्र प्रतियोगितामा सहभागी गराइएको थियो ।

सम्बन्धित खबर