शुक्रबार, ०१ कार्तिक २०७६
samadhannews
bindedswori home decore

जर्मनी गएका ४ कलाकार उतै फरार

बिहिबार, २६ असार २०७६
1770 पटक पढिएको

समाधान संवाददाता
पोखरा

नाटक लिएर जर्मनी पुगेको युथ क्रियसन थिएयरका ४ कलाकार उतै फरार भएका छन् । फरार हुनेमा कलाकार शर्मिला बस्नेत, सम्झना शर्मा, संरचना पौडेल (अञ्जना) र मधुसूदन पौडेल छन् । जर्मन सरकार अधिनस्थ प्रज्ञा प्रतिष्ठानको आयोजनामा हुने लोकसंगीत महोत्सवमा ‘घेरो’ नाटक १८ असारमा जर्मनी उडेका थिए ।

१२ जना कलाकारसहित जर्मनी उडेको टोलीको भिसावधि १ हप्ताको थियो । उनीहरुले महोत्सवमा जुलाई ५ र ६ गते २ दिन नाटक मञ्चन गरेका थिए । ८ जना २३ गते नेपाल फर्किंदा ४ जनाबाट भने उतै हराएको युथ क्रियसन थियटरले फेसबुकमार्फत पुष्टि गरेको छ । उतै लुकेकामध्ये सम्झना शर्मा नाटक लेखक केदार पौडेलकी जीवनसाथी हुन् । सम्झना कलाकार नभए पनि नाट्यटोलीमा समावेश गरी लगिएको थियो ।

‘उनीहरु कार्यक्रम सकिएपछि विभिन्न बहानामा भागेका हुन्,’ थियटरका सचिव सौगात पोखरेलले फेसबुकमा भनेका छन्, ‘उनीहरुलाई लुकाउन वा भगाउन हामीमध्ये कसैले सहयोग गरेको भए वा पैसा लेनदेन गरेको भए कारबाहीको भागेदारी हुन तयार छौं ।’ उनले जर्मनीमै पनि ती ४ जना हराएको सूचना दिइसकेको दाबी गरेका छन् ।

युरोपै बसेका कलाकार मधुसूदन पौडेलले आफू पोर्चुगल पुगेको फेसबुकमार्फत नै जानकारी दिएका छन् । उनले लेखेका छन्, ‘म अहिले पोर्चुगलमा छु । मलाई कुनै संस्थाले पैसा खाएर यहाँ ल्याएको होइन । आफ्नै राजीखुसीले आएको हुँ ।’ केदार पौडेलले लेखेको नाटकमा युवा रंगकर्मी तथा युथ क्रियसन थिएटरका अध्यक्ष कपिल शर्माको निर्देशन छ । नाटक गएको जेठ २४ गते काठमाडौंको सर्वनाम थिएटरमा मञ्चन भएको थियो ।

सम्बन्धित खबर