आइतबार, २९ मङि्सर २०७६
samadhannews
धवलागिरि हिमालको आधार शिविर पुग्न सहज

धवलागिरि हिमालको आधार शिविर पुग्न सहज

बुधबार, ०१ साउन २०७६
1570 पटक पढिएको

राकेश शर्मा
म्याग्दी

संसारको सातौँ अग्लो धवलागिरि हिमालको आधार शिविर जाने पदमार्ग सहज बन्न थालेको छ । म्याग्दीको धवलागिरी गाउँपालिका ४ मुदीमा रहेको यसको उचाइ ८ हजार १ सय ६७ मिटर छ छ । भीर र जंगलको जोखिमपूर्ण पदमार्गलाई फराकिलो बनाएर पूर्वाधार निर्माण गरिएपछि पर्यटक, पर्यटक मजदुर र स्थानीयलाई आवतजावत गर्न सजिलो भएको छ ।

गण्डकी प्रदेशको उद्योग, पर्यटन, वन तथा वातावरण मन्त्रालयको ५० लाख बजेटबाट नाउराभीरदेखि सल्लाघारीसम्म पदमार्ग मर्मत गरिएको हो । नाउराको भीर जोखिमपूर्ण पहाड हो । सो खण्डको ९ किलोमिटर ४ सय मिटर अप्ठ्यारो पदमार्गलाई फराकिलो बनाउने र ढुंगाको सिँढी चिनेर पदमार्ग मर्मत गरिएको गाउँपालिका अध्यक्ष थमसरा पुनले जानकारी दिइन् । ६० प्रतिशत खण्डमा साँघुरो बाटो फराकिलो बनाउने र ४० प्रतिशत खण्डमा ढुंगाको सिँढी चिनिएको छ ।

बगरको जेल्तुङदेखि सिङकुस, जुरकुस हँदै मल्कबाङ जोड्ने डाँडाखर्कसम्मको पदमार्गसमेत मर्मत गरिएको छ । यो वर्ष संघीय सरकारको पर्यटन मन्त्रालयबाट विनियोजन भएको १५ लाख बजेटबाट इटाली क्याम्पदेखि स्वीस क्याम्पसम्मको पदमार्गसमेत निर्माण गरिएको छ । करिब २ किलोमिटर ५ सय मिटर पदमार्ग मर्मत र फराकिलो बनाइएको उपभोक्ता समिति अध्यक्ष हरिप्रसाद तिलिजाले बताए । इटाली क्याम्पका एकमात्रै होटल व्यवसायीसमेत रहेका तिलिजाका अनुसार पदमार्ग निर्माणसँगै धवलागिरि आधार शिविर, चक्रीय धवलागिरि र हिमाल आरोहणका लागि जाने पर्यटकलाई सहज भएको छ ।

हिमपहिरोले बगाएको ठाउँ भीरमा नयाँ पदमार्ग बनाइएको छ भने चौरवनदेखि इटाली क्याम्पसम्मको अप्ठ्यारो पदमार्गलाई फराकिलो बनाइएको छ । बजेटको लागत अनुमान अनुसार १ हजार ७ सय मिटर पदमार्ग निर्माण गर्नुपर्ने भए पनि रकम बचत भएपछि करीब १ किलोमिटर पदमार्ग थप मर्मत गरिएको हो । यो वर्ष नै इटाली क्याम्पमा गण्डकी प्रदेश पर्यटन मन्त्रालयको ३२ लाख बजेटबाट सूचना केन्द्र र आकस्मिक स्वास्थ्य केन्द्र भवन निर्माण सुरु भएको छ ।

मन्त्रालयको अनुदान, स्थानीयवको श्रमदान र गाउँपालिकाको १० प्रतिशत लगानीमा सूचना केन्द्र र आकस्मिक स्वास्थ्य उपचार केन्द्र भवन निर्माण सुरु भएको गाउँपालिकाले जनाएको छ । पदमार्गअन्र्तगत सबैभन्दा जोखिमपूर्ण मानिने नाउराभीरमा तत्कालीन द्वन्द्वको समयमा माओवादीले श्रम शिविर तथा पर्यटकबाट चन्दा उठाएर पदमार्ग निर्माण सुरु गरेका थिए । शान्ति स्थापनापछि तत्कालीन जिविस र गाविसमार्फत विनियोजन भएको बजेटबाट भीरमा पदमार्ग बनाइएको थियो । मनोरम हिमशृंखलासँगै अग्ला झरना, जंगलको एकान्त वातावरण, नजिकै देखिने झारल, कस्तुरी मृग, डाँफे, तालतलैया, हिमनदीको दृश्य यस पदमार्गका आकर्षण हुन् ।

सम्बन्धित खबर