आइतबार, २९ मङि्सर २०७६
samadhannews
पोखरा रंगशालाः कृत्रिम होइन प्राकृतिक मैदान बन्ने

पोखरा रंगशालाः कृत्रिम होइन प्राकृतिक मैदान बन्ने

आइतबार, ०५ साउन २०७६
1670 पटक पढिएको

अमृत सुवेदी
पोखरा

पोखरा रंगशालाको फुटबल मैदानको हप्तादिनभित्र फेरि नयाँ डिजाइन बन्ने भएको छ । असारमै सक्ने भनिएको काम खेल मैदानको डिजाइन फाइनल नहुँदा बल्ल सुरु हुन लागेको छ ।

प्राकृतिक खेल मैदान बनाउने कि सामग्री ल्याएर कृत्रिम बनाउने भन्ने विषयमा नै निर्णय हुन सकेको थिएन । राष्ट्रिय खेलकुल परिषद, युवा तथा खेलकुद मन्त्रालय र ठेकेदार कम्पनीबीच भएको शुक्रबारको बैठकले प्राकृतिक खेल मैदान नै बनाउने निर्णय गरेको थियो ।

‘पोखरामा प्राकृतिक खेल मैदान नै बनाउने पक्का भएको छ । आर्टिफिसियल बनाउन काम अगाडि बढिसकेको थियो । त्यसलाई क्यान्सिल गरेर अर्को डिजाइन पेस गर्न भनेका छौं,’ राखेपका सदस्य सचिव रमेशकुमार सिलवालले भने, ‘ठेकेदार कम्पनीले १ हप्ताको समय मागेको छ ।’

१० गतेभित्र प्राकृतिक खेलमैदानको पुन डिजाइन गरी पेस हुने भएको छ । ठेकेदार कम्पनी र राखेपले प्राकृतिक खेलमैदानका लागि लागतसमेत जोडेर डिजाइन पेस गर्ने छ । जतिसक्दो डिजाइन फाइनल गरेर काम अगाडि बढाउन राखेपदेखि मन्त्रालयसम्म तातेको सिलवाल बताउँछन् ।

खैल मैदान नै नबनेपछि पोखरामा खेलाउने भनिएको मंसिरमा हुने १३ औं दक्षिण एसियाली खेलकुद (साग) अन्तर्गतका खेल पनि हुँदैन कि भन्ने शंका उब्जिएको थियो । साग अन्तर्गतको महिला फुटबल त्यही नयाँ मैदानमा हुने छ ।

‘कात्तिक भित्र सबै काम सकेर त्यही मैदानमा महिला फुटबल खेलाउनु छ । यो पोखरा र नेपालकै प्रतिष्ठाको कुरा हो,’ राखेप सदस्य राजेश गुरुङले भने, ‘कुनै पनि हालतमा साग खेलाउन प्राकृतिक मैदान तयार पार्नै पर्ने वाध्यता छ ।’

६ महिनाभित्रै काम सक्ने गरी गत साल फागुन २६ गते पोखरा रंगशालामा फुटबल मैदानको शिलान्यास भएको थियो । शिलान्यासपछि युवा तथा खेलकुदमन्त्री जगतबहादुर विकले समयमै फुटबल मैदान निर्माण सकिने बताएका थिए ।

कृत्रिम खेल मैदान बनाउन निर्माण कम्पनीले गिटी हालिसकेको थियो । अब त्यो गिटी फेरि उठाएर माटो हाल्नुपर्ने भएको छ । माटो हालेर कात्तिकभित्र साग खेलाउन दुबो उमारी प्राकृतिक मैदान तयार पार्नु पर्ने भएको छ ।

२ मध्ये कुन बनाउने भन्ने निर्णय नहुँदै ठेकेदार कम्पनीले जोखिम मोल्दै मैदानमा गिटी हालेको यो प्रोजेक्ट हेरिरहेका पश्चिमाञ्चल खेलकुद विकास समितिका इन्जिनियर प्रमिश ताम्राकारले बताए ।

ग्लोबल टेन्डरमार्फत रंगशाला निर्माणका लागि राखेपले भारतीय कम्पनी ग्रेट स्पोर्टस् इन्फ्रा प्रालि र नेपाली कम्पनी एमए कन्सट्रक्सन प्रालिलाई निर्माणको जिम्मेवारी दिएको छ । १ अर्ब २८ करोड रुपैयाँमा निर्माण सम्झौता भएको थियो । अब यो तागतसमेत तलमाथि हुने राखेपको भनाइ छ ।

मंगिर १५ गतेबाट हुने साग खेलअन्तर्गत महिला फुटबल यही मैदानमा गर्ने भनिएको छ । पोखरामा सागका खेल खेलाएरै छाड्ने युवा तथा खेलकुदमन्त्री जगत विकले दाबी गरेका छन् । उनी भन्छन्, ‘पोखरामा सागका खेल हुन्छन् । फुटबल मैदान पनि तयार भइसक्छ ।’ छिट्टै डिजाइन पास भएर धमाधम भए सागका खेल खेलाउन सकिने ताम्राकारको भनाइ छ ।

ठेकेदार कम्पनीले २२ करोड रुपैयाँ भुक्तानी लिइसकेको छ । आर्टिफिसियल वा प्राकृतिक जे बनाए पनि हुने भन्ने खालको कुरा भएकाले आर्टिफिसियल बनाउन गिटी बिच्छ्याइएको प्रोजेक्ट म्यानेजर हरिबाबु न्यौपानेको भनाइ छ । नयाँ बन्ने पोखरा रंगशालामा १६ हजार ५ सय दर्शक क्षमताको हुने छ । अन्तर्राष्ट्रिय मापदण्डअनुसार बन्ने भनिएको रंगशालाको चारैतिर छानासहित प्यारापिट रहने छ । यस्तै मैदानको छेउमा सिन्थेटिक ट्रयाक रहने छ ।

विसं २०३९ बनेको रंगशालाको विशिष्ट कक्ष २०७२ सालको भूकम्पबाट क्षति पुगेको थियो । नयाँ बन्ने फुटबल मैदानमा विशिष्ट कक्षसहित चेन्जिङ रुम र कन्फ्रेन्स हलसमेत हुने छ ।

सम्बन्धित खबर