बिहिबार, २५ असार २०७७
samadhannews
nepal telecome

आदिवासी दिवसमा मुख्यमन्त्रीको सन्देशः संवैधानिक हक व्यवहारमा उतार्न आवश्यक

शुक्रबार, २४ साउन २०७६
1920 पटक पढिएको

समाधान संवाददाता
पोखरा

गण्डकी प्रदेशका मुख्यमन्त्री पृथ्वीसुब्बा गुरुङले आदीवासी जनजातिका पक्षमा संविधानले गरेको व्यवस्थालाई व्यवहारमा उतार्नु आजको आवश्यकता भएको प्रतिक्रिया दिएका छन ।

२५औं विश्व आदिवासी दिवस (९अगस्ट)को अवसरमा बिहीबार शुभकामना सन्देश जारी गर्दै मुख्यमन्त्री गुरुङले नेपालको संविधानले नेपालमा बसोबास गर्ने प्रत्येक नेपाली समुदायलाई आफ्नो भाषा, लिपि, संस्कृति, साँस्कृतिक सभ्यता र सम्पदाको सम्बद्र्धन र संरक्षण गर्ने मौलिक हकको स्पष्ट व्यवस्था समेत गरेको उल्लेख गरेका छन ।

‘आदिवासी जनजातिको पक्षमा प्राप्त संवैधानिक हक अधिकारलाई व्यवहारमा उतार्नु आजको आवश्यकता र हामी सबैको दायित्व हो,’ सन्देशमा भनिएको छ, ‘संवैधानिक रुपमा पाएका आदिवासी जनजातिका सामाजिक, सांस्कृतिक, राजनीतिक र आर्थिक अधिकारको प्रयोग र रक्षा गर्दै प्राप्त अधिकारलाई व्यवहारमा उतार्न र थप अधिकारको सुनिश्चितताका लागि शान्तिपूर्ण, संवैधानिक र लोकतान्त्रिक माध्यमबाट अघि बढ्न जरुरी छ ।’

सन्देशमा संविधानले बहुजातीय, बहुभाषिक, बहुधार्मिक, बहुसांस्कृतिक तथा भौगोलिक विविधतायुक्त विशेषतालाई आत्मसात् गरी विविधताबीचको एकता, सामाजिक सांस्कृतिक ऐक्यबद्धता, सहिष्णुता र सद्भावलाई संरक्षण एवं प्रवर्धन गरेको उल्लेख छ ।

संविधानले वर्गीय, जातीय, क्षेत्रीय, भाषिक, धार्मिक, लैंगिक विभेद र सवै प्रकारका जातीय छुवाछूत अन्त्य गरी आर्थिक समानता, समृद्धि र सामाजिक न्याय सुनिश्चित गर्न समानुपातिक समावेशी र सहभागितामूलक सिद्धान्तका आधारमा समतामूलक समाजको निर्माण गर्ने संकल्पसमेत गरेको छ । सन्देशमा आदिवासी दिवसले समृद्ध नेपाल, सुखी नेपालीको राष्ट्रिय आकांक्षालाई पूरा गर्न साझा दायित्वबोधका साथ एकताबद्ध भई लाग्ने प्रेरणा दिने अपेक्षा गरिएको छ ।

सम्बन्धित खबर