शुक्रबार, ०१ कार्तिक २०७६
samadhannews
bindedswori home decore

दोबिल्लामा खुल्यो माउन्टेन ग्लोरी रिसोर्ट

शुक्रबार, २४ साउन २०७६
7100 पटक पढिएको

समाधान संवाददाता
पोखरा

पोखरा महानगरपालिका २१ दोबिल्लास्थित रहिचौरमा संयुक्त लगानीमा निर्मित ‘माउन्टेन ग्लोरी फरेस्ट रिसोर्ट एन्ड स्पा’ सञ्चालनमा आएको छ । रिसोर्टमा पर्यटकको बसाइ सुरु भइसकेको छ । रिसोर्टमा ८ जनाको लगानी छ ।

रिसोर्ट निर्माणाधीन अवस्थामा रहँदादेखि नै स्वदेशी र विदेशी पर्यटकको ध्यान खिच्न सफल भएको रिसोर्टका सेल्स एन्ड अपरेसन डाइरेक्टर किरण तुलाधरले जानकारी दिए । ‘यहाँको सेवासुविधा तथा सौन्दर्यले नै पर्यटकलाई आकर्षित गरिरहेको छ,’ उनले भने । ७२ रोपनी जग्गामा निर्मित रिसोर्टमा करिब १ अर्ब रुपैयाँ लगानी भएको रिसोर्टका कार्यकारी अध्यक्ष सुनीलभक्त श्रेष्ठले जानकारी दिए । ६४ कोठाबाट रिसोर्टले सेवा सुरु गरेको हो । ‘पोखरामा पहिलोपटक अत्याधुनिक सुविधासम्पन्न जंगल रिसोर्ट खोल्न सफल भएका छौं,’ उनले भने ।

रिसोर्टमा ६ वटा ब्लक र ६ वटा भिल्ला छन् । एउटा प्रेसिडेन्टल, एउटा सुइट र अरू बाँकी सबै सुपर डिलक्स कोठा छन् । पर्याप्त पार्किङ तथा स्वीमिङ पुलको सुविधा पनि रिसोर्टमा छ । जंगलको काखमा रहेको रिसोर्टबाट पोखरा तथा माछापुच्छ्र‍े, अन्नपूर्ण लगायत हिमाली शृंखला लामो रेन्जमा देख्न सकिने सञ्चालक धु्रवबहादुर थापाले बताए ।

‘प्रत्येक रूमबाट हिमालको दृश्यावलोकन गर्न सकिन्छ,’ सञ्चालक थापाले भने । सेती नदी र फुस्रे खोलाको संगमस्थल तथा वरपरका हरियाली जंगल तथा पहाडको पनि रिसोर्टबाट दृश्यावलोकन गर्न सकिन्छ । रिसोर्ट परिसरमा साइकल ट्रयाक र फुट ट्र्याक पनि बनाइएको छ ।

रिसोर्टमा ठूलासाना गरी ४ वटा हल छन् । उच्च स्तरीय पर्यटक लक्ष्य गरी रिसोर्ट सञ्चालनमा ल्याइएको थापाले उल्लेख गरे । रिसोर्ट पोखरा विमानस्थलबाट ७ किलोमिटर र निर्माणाधीन अन्तरर्राष्ट्रिय विमानस्थलबाट करिब ४ किलोमिटर दुरीमा पर्छ । रिसोर्टका कार्यकारी अध्यक्ष श्रेष्ठले प्राकृतिक तथा हरियाली वातावरणमा रिसोर्ट बनेकाले पनि धेरै पर्यटक आउने विश्वास व्यक्त गरेका छन् । केही समयपछि रिसोर्टमा लगानी बढाएर १ सय कोठा पु‍र्‍याउने श्रेष्ठले बताए । त्यसका लागि करिब ५० करोड रुपैयाँ थप लगानी हुनेछ ।

सम्बन्धित खबर