आइतबार, ०१ भदौ २०७६
samadhannews
e planet education.

सेल्फी पार्कमा मुख्यमन्त्री गुरुङ

बुधबार, २९ साउन २०७६
2460 पटक पढिएको

एसके थकाली
जोमसोम

यार्तुङ महोत्सव उद्घाटन गरी फर्किएका गण्डकी प्रदेशका मुख्यमन्त्री पृथ्वीसुब्बा गुरुङले सेल्फी पार्क अवलोकन गरेका छन् । मुख्यमन्त्रीका साथै प्रदेश प्रमुख सचिव हरिप्रसाद बस्याल, संघीय सांसद प्रेमप्रसाद तुलाचन, प्रदेश सांसद र विभिन्न सरोकारवालाले पनि पार्क अवलोकन गरे ।

सेल्फी पार्कमा मुख्यमन्त्री गुरुङको टोलीले केही समय विश्राम लियो । पार्कभित्रको भ्युटावर चढी टोलीका सदस्यले कागबेनी क्षेत्रको सुन्दर दृष्य पनि हेरे । उनले पार्कभित्रकै कृत्रिम सिमेन्ट र वालुवाले निर्मित गोलाकार शालिग्राम पनि नियाले । शालिग्राम कालिगण्डकी नदीमा पाइने भएकाले यो नमुना पार्कमा राखिएको हो ।

नेपाल भ्रमण २०२० नजिकिँदै गर्दा यस प्रकारको पूर्वाधारले पर्यटन विकासमा टेवा पुग्ने उनले बताए । जोमसोमदेखि माथि कागबेनी हुँदै मुक्तिनाथ जाने सडकको बाँयातर्फ सेल्फी पार्क छ । कागबेनी माथि सडकको दोस्रो मोडको करिब ३ हजार मिटर उचाइमा पार्क निर्माण भएको गाउँपालिकाका अध्यक्ष फेञ्चोक छेप्तेन गुरुङ धाराले जानकारी दिए । पार्क निर्माणका लागि संघीय स्थानीय पूर्वाधार विकास कार्यक्रम अन्तर्गत २५ लाख र बाँकी ३ लाख जनश्रम दान तथा सहयोग जुटाइएको हो । पार्कको निर्माण स्थानीय पार्क निर्माण उपभोक्ता समिति गरेको अध्यक्ष लक्ष्मी गुरुङले बताइन् ।

करिब २ सय मिटर लम्बाइ तथा सय मिटर चौडाइ रहेको पार्कवरपर पर्खालले घेरिएको छ । पार्कभित्र जाने मुख्य प्रवेशद्वार कलात्मक रुपमा तयार गरिएको छ । द्वारको माथिपट्टि ढुंगा अड्याइ गजुर बनाइएको छ । चारैतिर सल्ला र धूपीका विरुवा रोपिएको छ ।

मुक्तिनाथ दर्शन गर्न गाडी तथा मोटरसाइकल चढेर आउने धेरै तीर्थालु यहाँ अडिन्छन् । फोटो खिच्छन् र वरिपरिका दृष्य नियाल्छन् । पार्क आकर्षणको केन्द्र बनेको प्रमुख प्रशासकीय अधिकृत दीपक रेग्मीले जानकारी दिए । साविक खुला चरनक्षेत्र रहेको स्थानमा पार्क बनाइएको हो । पार्कबाट कागबेनी गाउँ, कालिगण्डकी करिडोर र पहाडहरु नियाल्न सकिन्छ । यहाँबाट कागबेनी र आसपासका गाउँमा लगाएका स्याउ, फापर र उँवा खेतीको हरियाली पनि देख्न सकिन्छ । पार्कबाट गाडी चढेर आधा घण्टामा मुक्तिनाथ पुगिन्छ ।

सम्बन्धित खबर