सोमबार, ३० भदौ २०७६
samadhannews
कात्तिकमा ‘बादशाह जुट’

कात्तिकमा ‘बादशाह जुट’

मङ्गलबार, ०३ भदौ २०७६
1020 पटक पढिएको

समाधान संवाददाता
पोखरा

गत वर्षको पुस १३ गते आउने निश्चित भए पनि अन्तिम समयमा प्राविधिक कारण देखाउँदै पोस्टपोन्ड भएको फिल्म ‘बादशाह जुट’को नयाँ प्रदर्शन मिति घोषणा गरिएको छ । यो फिल्म अब आउँदो कात्तिक १ गतेबाट प्रदर्शनमा आउने भएको छ । पोस्टरमा फिल्मका लिड अभिनेता सुशील श्रेष्ठ र कलाकार रविन तामाङ फिचर्ड छन् ।

‘बादशाह जुट’ आफूले आफूलाई बादशाह सम्झने २ युवाको कथामा निर्माण भएको निर्देशक जोनीसिंह राणाले बताए । यसअघि उनले १ बलिउड फिल्मसमेत निर्देशन गरिसकेका छन् । उनी आफैंले तयार पारेको कथामा निर्मित यस फिल्ममा आमिर गौतम, रोषी खड्का, केइषा रावत, रश्मि तामाङ, दीपक क्षेत्री, कमलमणि नेपाल लगायतको पनि अभिनय छ ।

फिल्मको गत वर्ष नै ‘काफल पाक्यो’ गीत सार्वजनिक गरिएको थियो । गीतमा अभिनेत्री प्रियंका कार्की प्रमुख फिचर्ड थिइन् । उनी यस फिल्ममा अतिथी भूमिकामा रहेको निर्देशक राणाले बताए । तासको खेलमा बादशाह जुटलाई शक्तिशाली मानिन्छ । पोस्टरमा सुशील र रविनलाई मात्र स्थान दिइनुले फिल्ममा यी २ आफूलाई बादशाह सम्झने भूमिकामा रहेको अनुमान गर्न गाह्रो पर्दैन ।

एच एन्ड बि फिल्मस् प्रालि र गोल्डेन ग्रेप्स फिल्मस् एन्ड इन्टरटेनमेन्ट प्रालिको संयुक्त ब्यानरमा निर्माण भएको फिल्ममा राजु कार्कीको डिओपी, राजकुमार उप्रेतीको द्वन्द्व, कृष्ण भारद्वाज, कोशिस क्षेत्री र मोहित मुनालको संगीत, दीर्घ खड्काको सम्पादन छ । हर्कबहादुर कुँवर (पिटर) र भोजराज श्रेष्ठ (मिकी) ले फिल्मको निर्माण गरेका हुन् ।

सम्बन्धित खबर