सोमबार, ३० भदौ २०७६
samadhannews
मिडिया कपकाे उपाधि आयोजकलाई नै

मिडिया कपकाे उपाधि आयोजकलाई नै

बिहिबार, १२ भदौ २०७६
760 पटक पढिएको

समाधान संवाददाता
पोखरा

पहिलो संस्करणको पोखरा मिडिया कप आयोजक ‘जक्सन १६’कै पोल्टामा परेको छ । फाइनल राउन्डमा आयोजक ‘जक्सन १६’ को तर्फबाट खेलेका ‘ए’ र ‘बी’ समूहमध्ये समूह ‘ए’ विजेता बन्यो । खेलमा दुवै पक्षबाट १–१ गोल भएपछि निर्णय टाइब्रेकरले गरेको थियो । टाइब्रेकरका क्रममासमूह ‘ए’का गोलकिपरले गौसब गुरुङले उत्कृष्ट बचाऊ गर्दै आफ्नो समूहलाई जिताए ।

विजेता बनेसँगै जक्सन ‘ए’ले नगद ३५ हजारसहित ट्रफी, मेडल र प्रमाणपत्र प्राप्त ग¥यो । उपविजेता ‘बी’ले २० हजार, ट्रफी, मेडल र प्रमाणपत्रमा चित्त बुझायो । विजेतालाई साझा पार्टीका गण्डकी संयोजक महेश भण्डारी, नेपाली फुटबल टिमका पूर्वकप्तान अनिल गुरुङ र म्याट्रिक्स एरेनाका सञ्चालक अमनविक्रम थापाले पुरस्कार प्रदान गरेका थिए ।

प्रदेश सांसद बिन्दुकुमार थापाले सबै सहभागीलाई धन्यवाद ज्ञापन गरे । उनले यो प्रतियोगिताले पत्रकारिता जगत नै खेलप्रति आकर्षित भएको उल्लेख गरे । ‘यो खेलकुद र पत्रकारिता क्षेत्रकै लागि राम्रो सन्देश हो,’ सांसद थापाले भने, ‘आपसमा भाइचारा बढाउनुसँगै स्वास्थ्यप्रति सचेतना पनि जगाउने यस्ता खाले प्रतियोगिताले निरन्तरता पाउनुपर्छ ।’

प्रतियोगितामा सुशान्त गाहामगर उत्कृष्ट खेलाडी घोषित भए । विजय नेपालीले उत्कृष्ट गोलकिपरको पुरस्कार प्राप्त गरे । प्रतियोगिता अवधिभर सबैभन्दा धेरै गोल गर्दै निकोलस गुरुङले ‘हाइ स्कोरर’को उपाधि पाए ।सबैभन्दा अनुशासित खेल खेलेको भन्दै ‘भोग स्टुडियो’ पुरस्कृत भयो । प्रतियोगिता संयोजक अरुण गिरीले खेलमा प्रत्यक्ष, अप्रत्यक्ष सहयोग गर्ने सबैलाई धन्यवाद दिए ।

सेलिब्रिटी टिमले पत्रकारलाई हरायो

पोखरा मिडिया कप अन्तरगत बुधबार भएको ‘महिला पत्रकार’ र ‘महिला सेलिब्रिटी’को मैत्रीपूर्ण खेलमा कलाकार टोली विजयी बनेको छ । १–० गोल अन्तरले कलाकारले नतिजा आफ्नो पोल्टामा पारे । खेलका लागि अभिनेत्री सुरविना कार्की, सम्पदा बानियाँ र मोडल सोनिका रोकाया पोखरा आएका थिए । उनीहरुसँगै पोखराका चर्चित महिला कलाकारले महिला पत्रकारसँग फुटसल खेलेका थिए ।

आगामी दिनमा पनि यस्तै प्रतियोगिता हुनुपर्ने महिला पत्रकार समूहका क्याप्टेन सरिता तिमिल्सिना पंगेनीले बताइन् । महिला पत्रकारसँग खेल्न पाउँदा आफूहरु निकै खुसी भएको अभिनेत्री सुरविना कार्कीको टिप्पणी छ ।

सम्बन्धित खबर