सोमबार, ०६ माघ २०७६
samadhannews
nepal telecome

विदेशबाट फर्किए मुख्यमन्त्री

बुधबार, १८ भदौ २०७६
1410 पटक पढिएको

समाधान संवाददाता, पोखरा

गण्डकी प्रदेशका मुख्यमन्त्री पृथ्वीसुब्बा गुरुङ १० दिने विदेश भ्रमण सकेर फर्किएका छन् । बेलायत भ्रमण सकेर उनी मंगलबार पोखरा आइपुगे । पोखरा विमानस्थलमा पत्रकारहरुसँग कुरा गर्दै मुख्यमन्त्री गुरुङले प्रदेशको पर्यटन र खेलकुदको क्षेत्रमा लगानी गर्न बेलायतबासी नेपाली उत्साहित देखिएको सुनाए ।

एनआरएन बेलायत र व्यवसायी गरेर बसेका नेपालीसँगको छलफलको क्रममा प्रदेशमा लगानीका लागि इच्छा देखाएको र लगानीमैत्री वातावरण बनाउने आफूले बचन दिएको उनले बताए । अन्तर्राष्ट्रिय म्याराथन तथा फुटबल लगायत खेलकुद क्षेत्रमा सहारा युके लगायत संस्थाले व्यवस्थित लगानीको इच्छा देखाएको पनि मुख्यमन्त्री गुरुङले बताए ।

मुख्यमन्त्री गुरुङले भूपूगोर्खा सैनिकसँग समेत भेट गरेका थिए । भेटमा उनीहरुले आफूहरुले भोगिरहेको विभेदको विषयमा सरकारको तर्फबाट पहल गरिदिन आग्रह गरेको उनले बताए । मुख्यमन्त्रीको वेलायत भ्रमणको क्रममा पोखरा सहर र बेलायतको म्यानचेस्टर सिटीबीच भागिनी सम्बन्ध कायम गर्ने विषयमा त्यहाँको प्रतिनिधिसँग छलफल भएको छ ।

बेलायतका नेपालीभाषी जनप्रतिनिधि नर्थ योर्कसायरका मेयर जनक शर्मा र लण्डनका डेपुटी मेयर लक्ष्य गुरुङसँग भेटेर दुई पक्षीय हित र सहयोग सम्वन्धमा छलफल गरेको मुख्यमन्त्री गुरुङले बताए । अक्सफोर्ड विश्वविद्यालयका प्राध्यपकको समूहसँग समेत मुख्यमन्त्री गुरुङले भेटेका थिए । भेटको क्रममा विश्वविद्यालयमा अध्ययनरत नेपाली विद्यार्थीको अवस्था र विभिन्न अध्ययन अनुसन्धान नेपाललाई सघाउने बचन प्राध्यापकले दिएको मुख्यमन्त्री गुरुङले बताए । समंग्रमा आफ्नो वेलायत भ्रमण सफल भएको र यसले प्रदेशमा लगानी बढाउने महत्वपूर्ण टेवा पुग्ने मुख्यमन्त्री गुरुङको दाबी छ ।

बेलायतमा आयोजना हुने नेपाली मेला भाग लिन मुख्यमन्त्री गुरुङ भदौ ६ गते त्यसतर्फ प्रस्थान गरेका थिए । विमानस्थलमा मुख्यमन्त्री गुरुङलाई प्रदेशका आन्तरिक ममिला तथा कानुन मन्त्री हरिबहादुर चुमान, भौतिक पूर्वाधार विकास मन्त्री रामशरण बस्नेत, उद्योग पर्यटन तथा वन वातावरण मन्त्री विकास लम्साल, मुख्यमन्त्रीका राजनीतिक सल्लाहकार गोविन्दबहादुर नेपाली र प्रदेशका प्रमुख सचिव हरिप्रसाद बस्याल लगायतले स्वागत गरेका थिए ।

सम्बन्धित खबर