सोमबार, ३० भदौ २०७६
samadhannews
तिब्बती शरणार्थी नागरिकता प्रकरणः   ४ जनाको बयान सकियो

तिब्बती शरणार्थी नागरिकता प्रकरणः ४ जनाको बयान सकियो

बिहिबार, १९ भदौ २०७६
950 पटक पढिएको

समाधान संवाददाता
पोखरा

नागरिकता प्रकरणमा मुछिएका पोखरा – १८ का वडाध्यक्ष, तिब्बती युवतीसहित १४ जनाविरुद्ध जिल्ला अदालत कास्कीमा दायर मुद्दामा बुधबार बयान सुरु भएको छ ।

पोखरा– १८ सराङकोट निवासी लेखबहादुर थापाले हेमजाको तिब्बती शरणार्थी क्याम्पमा बस्दै आएका आफ्ना २ नातिनीलाई छोरी बनाई जिल्ला प्रशासन कार्यालय कास्कीबाट नागरिकता उपलब्ध गराएको प्रकरणमा मुछिएकामध्ये बुधबार ४ जनाको बयान भएको छ । बाबु बनेर सनाखत गर्ने लेखबहादुर थापा, नागरिकता लिने सरु थापामगर र तासी आङ्मो थापामगर र वडाध्यक्ष रणबहादुर थापाको बुधबार बयान लिएको अदालतले जनाएको छ । बाँकी १० जनाको बिहीबार हुनेछ । बयान सकिए लगतै बुधबार नै थुनछेक बहस हुनेछ ।

बाबु बनेर सनाखत गर्ने लेखबहादुर, नागरिकता लिने सरु थापामगर र तासी आङ्मो थापामगर, सर्जमिन मुचुल्कामा दस्तखत गर्ने बेलबहादुर थापा, ज्ञानबहादुर थापा क्षेत्री, सन्तोष थापामगर, कमल थापा र इमा थापामगर विरुद्ध सरकारी वकिलको कार्यालयमार्फत मंगलबार मुद्दा दर्ता भएको हो ।

पोखरा १८ का अध्यक्ष रणबहादुर थापा, वडा सदस्य ज्ञानबहादुर थापा र जिल्ला प्रशासन कार्यालय कास्कीका अधिकृत ऋषिराम आचार्य, नायब सुब्बा डाँसीराम लामिछाने, खरीदार परशुराम पौडेल र रामचन्द्र थापा विरुद्धसमेत कास्की जिल्ला अदालतमा मुद्दा दर्र्ता भएको थियो ।

जेठ २६ गते र असार ६ गते जारी भएका २ नागरिकता भने जिल्ला प्रशासन कार्यालयले यसअघि नै खारेज गरिसकेको छ । राष्ट्रप्रेमी नेपाली समूहले उजुरी दिएपछि तत्कालीन सिडिओ चक्रबहादुर बुढाले छानबिन गरी कारबाही प्रक्रिया अघि बढाएका हुन् । तिब्बती शरणार्थीसँग बिहे गरेकी छोरीका छोरीलाई नागरिकता दिलाउन लेखबहादुरले झुठो विवरण पेस गरेका थिए ।

सम्बन्धित खबर