मङ्गलबार, ०६ असोज २०७७
samadhannews
Bardan Online

‘समृद्धिमा निजी क्षेत्रको भूमिका महत्वपूर्ण’

बुधबार, २५ भदौ २०७६

कृष्ण न्यौपाने
दमौली

गण्डकी प्रदेशका आर्थिक मामिला तथा योजनामन्त्री किरण गुरुङले समृद्ध मुलुक बनाउन निजी क्षेत्रको भूमिका महत्वपूर्ण हुने बताएका छन् । दमौलीमा समाधान अस्पताल मंगलबार उद्घाटन गर्दै मन्त्री गुरुङले निजी क्षेत्र लगानी गर्न तयार नभए मुलुक नबन्ने बताए ।

निजी क्षेत्रको लगानीमा स्वास्थ्य संस्था खुल्नु खुसीको कुरा भएको बताउँदै मन्त्री गुरुङले स्वास्थ्य संस्थाले गुणस्तरीय सेवा प्रवाह गर्नुपर्नेमा जोड दिए । स्वास्थ्य क्षेत्र संवेदनशील क्षेत्र भएकाले सेवा प्रवाहका क्रममा गम्भीर हुनुपर्ने मन्त्री गुरुङको भनाइ थियो ।

मानिस स्वस्थ हुनुपर्ने र स्वस्थ मानिस भएमात्रै राष्ट्र निर्माणमा जोडिन सक्ने बताए । हरेक व्यक्ति उत्पादनसँग जोडिनुपर्ने बताउँदै मन्त्री गुरुङले प्रत्येक व्यक्तिमा देशको लागि केही गर्छु भन्ने भावना हुनुपर्ने बताए । ‘राज्यको एकल प्रयासले मात्रै समृद्ध मुलुक बन्न सक्दैन,’ मन्त्री गुरुङले भने, ‘निजी क्षेत्र, सहकारी क्षेत्र र आम सर्वसाधारणको प्रयासले मात्रै सुखी नेपाली, समृद्ध नेपाल बन्छ ।’

मन्त्री गुरुङले नकारात्मक सोचलाई त्याग्दै सकारात्मक सोचका साथ राष्ट्र निर्माणमा लाग्नुपर्ने बेला आएको चर्चा गरे । ‘अबको समय नकारात्मक कुरा गरेर बिताउने समय होइन,’ गुरुङले भने, ‘हरेक व्यक्ति उत्पादनसँग जोडिनुपर्छ, त्यसको लागि प्रदेश सरकार सहयोग गर्न तयार छ ।’

मन्त्री गुरुङले मागेर देश बन्दैन भन्दै भएका स्रोत, साधन उपयोग गरी देश बनाउनुपर्नेमा जोड दिए । ७ प्रदेशमध्ये गण्डकी प्रदेश सबैभन्दा धनी प्रदेश हुने र त्यसका लागि प्रदेशमा भएका प्राकृतिक स्रोत, साधनलाई उपयोग गरिने उनले बताए ।

कार्यक्रममा संघीय सांसद कतिला खानले अस्पतालले गुणस्तरीय सेवा प्रवाह गरेर सर्वसाधारणको मन जित्नुपर्नेमा जोड दिइन् । दमौली आसपासका सर्वसाधारणलाई सुलभ मूल्यमा स्वास्थ्य सेवा प्रवाह गर्ने उद्देश्यसहित अस्पताल स्थापना गरिएको अस्पताल सञ्चालक समिति अध्यक्ष समिम खानले जानकारी दिए ।

अस्पताल शुभारम्भको अवसरमा स्वास्थ्य परीक्षणमा छुटसमेत दिइएको अस्पतालले जनाएको छ ।

सम्बन्धित खबर