मङ्गलबार, १३ फागुन २०७६
samadhannews
nepal telecome

पशुपति र इतुलाई सम्मान

बिहिबार, २६ भदौ २०७६
1840 पटक पढिएको

समाधान संवाददाता, पोखरा

सांगीतिक अभियान सुगम सङ्गीत यात्राको स्वर्ण शृंखलामा गायक पशुपति गुप्ता र गायिका इतु जोजिजूलाई सुगम संगीत सम्मान प्रदान गरिने भएको छ ।

२०४७ मा सुधा सागर…बोलको गीत रेकर्ड गरेर सुगम संगीतमा लागेका पोखरेली गायक गुप्ताका हत्केलामा…, तिम्रै मायाको प्यासी…, परपर…., कहिले मिलन कहिले विछोड…लगायत सुगम गीत रेकर्ड भएका छन् ।

२०५४ मा माया गर्छु भनेर… बोलको गीत रेकर्ड गरेर सुगम संगीतमा लागेकी पोखरेली गायिका इतुको चरणामृत, चयन, चिनो र चहक गरी ४ वटा एल्बम बजारमा आइसकेका छन् । त्यो कहिले घाम कहिले छाया होस्…., जहाँ भ्रमर छ…, बिर्सन सजिलो भएन…लगायत चर्चित गीतका गायिका इतुका हालसम्म १ सयभन्दा बढी गीत रेकर्ड भएका छन् । इतु पोखरेली गायिकाहरुको संस्था हार्मोनी पोखराकी अध्यक्षसमेत हुन् ।

पोखरामा क्रियाशील ३ ओटा सांगीतिक संस्था अनुपम म्युजिक, त्रिवेणी संगीतालय र जेई म्युजिक एकेडेमीको संयुक्त सञ्चालनमा मासिक रुपमा सुगम संगीत यात्रा हुँदै आएको छ । आगामी भदौ २८ गते शनिबार पोखरा उद्योग वाणिज्य संघमा हुने यात्राको स्वर्ण शृंखलामा रामभक्त जोजिजू, इतु जोजिजू, पशुपति गुप्ता, लक्ष्मी गिरी, ज्ञान थापा, रोम तामाङ, एमडी काफ्ले, जय चापागाईँ, देवीमाया गुरुङ, पिङ्गला भट्ट, सन्तोष बस्याल, सन्तोष पराजुली, सुनील बराल, रोहनजङ कार्की, उपेश थापा, प्रज्ज्वल भित्रीकोटी, योगेश गौतम, कमला अर्याललगायत पोखराका डेढ दर्जन नयाँ तथा पुराना कलाकारले प्रत्यक्ष वाद्यवादनसहित सांगीतिक प्रस्तुति दिने छन् ।

२०७२ साउन २ गते पोखराको तालबाराहीबाट सुरु भएको यात्रा पोखरा वरिपरिका विभिन्न ठाउँ लगायत तनहुँ, पर्वत, काठमाडौं, दार्जिलिङ लगायत ठाउँमा सम्पन्न भइसकेका यात्राका अध्यक्ष अनुराग अधिकारीले जानकारी दिए ।

सम्बन्धित खबर