सोमबार, २७ असोज २०७६
samadhannews
bindedswori home decore

कीर्तिमानी सुनको भाउ ओरालो लाग्यो

सोमबार, ३० भदौ २०७६
1010 पटक पढिएको

समाधान संवाददाता
पोखरा

कीर्तिमानी मूल्य तोड्दै नयाँ कीर्तिमान बनाएको सुनको बजारमा फेरि मूल्य घट्न थालेको छ । सुनको भाउले गत भदौ ९ मा अहिलेसम्मकै सबैभन्दा बढी मूल्यको कीर्तिमानी बनाएको थियो । त्यो दिन नेपाली बजारमा प्रतितोला ७३ हजार ५ सयमा सुनको कारोबार भएको थियो ।

आइतबार सुनको मूल्य घटेर प्रतितोला ७० हजार २ सय भएको छ । नेपाल सुनचाँदी व्यवसायी राष्ट्रिय महासंघले प्रतितोला ४ सय रुपैयाँ घटाएर नयाँ मूल्य निर्धारण गरेको हो ।

शुक्रबार नेपाली बजारमा प्रतितोला सुन ७० हजार ६ सयमा कारोबार भएको थियो । यस्तै तेजाबी सुनको मूल्य पनि घटेको छ । आइतबार तेजाबी सुनको मूल्य प्रतितोला ६९ हजार ९ सय पुगेको महासंघले जनाएको छ ।

चाँदीमा प्रतितोला ३० रुपैयाँले घटेको छ । शुक्रबार प्रतितोला ८ सय ७० रुपैयाँमा कारोबार भएको चाँदी आइतबार ८ सय ४० रुपैयाँ पुगेको हो । नेपाली बजारमा सुन चाँदीको मूल्य अन्तर्राष्ट्रिय बजारमा भएको परिवर्तनले सबैभन्दा ठूलो प्रभाव पार्छ । अन्तर्राष्ट्रिय बजारमा सुनको मूल्यमा लगातार ओरालो लागेका कारण नेपाली बजारमा पनि कमी आएको हो ।

बजार मूल्यमा कमी आए पनि पूर्ववत रुपमा कारोबार भने हुन नसकेको महासंघ कास्कीका कार्यवाहक अध्यक्ष भविन्द्र विश्वकर्माले जानकारी दिए । ‘सुनको मूल्य झनै ओरालो लाग्छ कि भनेर उपभोक्ता पर्खाइमै बस्ने पनि हुन्छन्,’ उनले भने, ‘सिजन सुरुवातमै मूल्य घट्ने संकेत त देखाएको छ । बजारमा कस्तो प्रभाव पार्छ भन्न सक्ने अवस्था छैन ।’

नेपालभर बिहेबारीको सिजनमा मात्रै झन्डै ४० किलो सुन विगतका वर्षमा खपत हुँदै आएको कावा अध्यक्ष विश्वकर्माको भनाइ छ । पोखरामा आजभोलीको समयमा भने विगतको तुलनामा १० प्रतिशत मात्रै व्यापार भइरहेको उनले बताए । बिहेबारी सिजनमा सुनको मूल्य औसतमै स्थिर रहे बजारमा चहलपहल बढ्ने आशा गरिएको छ ।

सम्बन्धित खबर