सोमबार, २७ असोज २०७६
samadhannews
bindedswori home decore

पोखरा रंगशालामा मन्त्री विश्वकर्माको चासो

सोमबार, ३० भदौ २०७६
1740 पटक पढिएको

समाधान संवाददाता
पोखरा

युवा तथा खेलकुद मन्त्री जगत विश्वकर्माले आइतबार पोखरा रंगशालाको निर्माण प्रगतिबारे जानकारी लिएका छन् । उनले बजेटका कारणले पूर्वाधारको काम रोकिने दाबी गरे । उनले पोखरा रंगशालाको निर्माण तीव्र रुपमा अघि बढेको बताउँदै बजेटको कमी नहुने सुनाए । आइतबार बिहान फुटबल स्टेडियम, आर्चरी, इस्क्बास, टेनिस लगायतको खेलमैदानको निरीक्षण गर्दै बजेको कारण पूर्वाधार बनाउन नरोकिने बताएका छन् ।

मन्त्री विश्वकर्माले तोकिएको समयभन्दा अघि नै भौतिक निर्माणको काम सकिने बताए । उनले क्षेत्रीय खेलकुद विकास समिति र जिल्ला खेलकुद विकास समितिको निर्माण गर्न खेलकुद ऐन पास नभएको कारण समस्या भएको जनाए ।

पोखरामा रंगशाला निर्माण तीव्र पार्न पनि मन्त्री विश्वकर्माले निर्देशन दिए । भदौ २६ गते मन्त्रिपरिषदको बैठकले १३ औं दक्षिण एशियाली खेलकुद कार्यविधि पारित गरेको जानकारी दिँदै १३ औं दक्षिण एसियाली खेलकुद पूर्व तयारी तयारी तीव्र रुपमा अघि बढेको जानकारी मन्त्रीले दिए । असोज १० गतेभित्र विभिन्न उपसमिति निर्माण गर्ने र पोखराका स्थानीयलाई राखेर स्थानीय व्यवस्थापन सहजीकरण समिति बनाउने उनले सुनाए ।

उनले साग नेपालको प्रतिष्ठाको विषय भएकाले स्वीकृति लिएर काम अगाडि बढाउन निर्देशन गरे । १३ औं दक्षिण एशियाली खेलकुद प्रतियोगितामा आर्चरी, प्याराग्लाइडिङ, ह्यान्डबल, ट्रायथोलन, भारत्तोलन, क्रिकेट, महिला फुटबल खेल पोखरा रंगशालामा खेलाइने तयारी छ । १३ औं दक्षिण एसियाली खेलकुद डिसेम्बर १ देखि १० सम्म पोखरा र काठमाडौंमा आयोजना गरिने छ । खेलाडीलाई आवश्यक पर्ने चेन्जिङ रुम र शौचालय लगायतको निर्माण पोखरा रंगशालामा अहिलेसम्म भएको छैन ।

‘फुटबल स्टेडियमको ४० प्रतिशत काम सकियो’
पोखरा रंगशालामा बन्दै गरेको फुटबल स्टेडियमको ४० प्रतिशत काम सकिएको निर्माण कम्पनीले बताएको छ । निर्माण कम्पनीका दीपक बरालले अहिले ४० प्रतिशत काम सकिएको जनाए । अहिले फुटबल स्टेडियमभित्रको ट्र्याक निर्माणको काम अन्तिम चरणमा पुगेको छ । ट्र्याक पिच गर्ने तयारीमा रहेको बरालले जानकारी दिए । उनले अहिले पिच गर्ने तयारी गरिएको र अहिले मौसमको कारण केही समस्या आएको बताए । ‘पोखरामा केही दिनअघिबाट पानी परेका कारण पिच गर्ने काम रोकेका हौँ,’ बरालले भने, ‘केही दिन घाम लागेपछि पिच गर्न सुरु गछौँ ।’

अहिले ट्र्याकको सफा गर्ने, र मैदानको भागमा बालुवा राखेर समथर बनाउने लगायत काम भइरहेको बरालले बताए । पिच गरिएको ठाउँमा ग्रानुयन्स सिन्थेटिक राखिने छ । पोखरामा शनिबार नै केही मात्रामा ग्रानुयन्स सिन्थेटिक ल्याइएको बरालले बताए । बरालका अनुसार अबको केही समयमा मैदानको भागमा बिच्छ्याउने घाँस पोखरामा आउने छ । १ सय ४० जना कामदार प्रयोग गरेर निर्माणको गरिएको बरालले सुनाए ।

सम्बन्धित खबर