सोमबार, २७ असोज २०७६
samadhannews
bindedswori home decore

आर्चरीको खेलाडी छनोट सुरु

सोमबार, ३० भदौ २०७६
380 पटक पढिएको

रासस, कास्की

आगामी मंसिर १५ देखि २४ गतेसम्म नेपालमा आयोजना हुने १३ औं दक्षिण एशियाली खेलकुद प्रतियोगिता (साग) मा आर्चरीका लागि खेलाडी छनोट पोखरामा सुरु भएको छ । पोखरा रंगशालाको आर्चरी मैदानमा शनिबारदेखि ‘रिकर्भ’ ‘क्याटेगोरी’ का लागि खेलाडी छनोट प्रक्रिया सुरु गरिएको नेपाल आर्चरी संघका अध्यक्ष दीपकराज गुरुङले बताए ।

आर्चरीको रिकर्भ र ‘कम्पाउन्ड’ गरी २ क्याटेगोरीमा प्रतिस्पर्धा हुने भएकाले आगामी भदौ ३० गतेसम्म खेलाडी छनोट गरिसकिने उनले जानकारी दिए । रिकर्भका लागि १७ पुरुष र ११ महिलामध्येबाट सागका लागि ४ पुरुष र ४ महिला छनोट गरी आगामी असोज १ गतेबाट पोखरामै बन्द प्रशिक्षण सुरु गरिने अध्यक्ष गुरुङको भनाइ छ । सागको आर्चरीको प्रतिस्पर्धा पोखरामा सञ्चालन गर्ने निश्चित भइसकेको छ ।

कम्पाउन्डतर्फ भने यसअघिनै ४ पुरुष र ४ महिला खेलाडी छनोट गरिसकिएको संघले जनाएको छ । पुरुषतर्फ रमेश भट्टचन, सनातन मल्ल, योगेन्द्र शेरचन र मीनप्रसाद गौचन छन् । महिलातर्फ पार्सदा आचार्य, मोनिका राना, रश्मी दर्लामी र मञ्जु बजगार्इँ अन्तिम सूचीमा परेका छन् । सागको आर्चरीतर्फ १० स्वर्ण, १० रजत र १० काश्य पदका लागि खेलाडीबीच प्रतिस्पर्धा हुने नेपाल आर्चरी संघका वरिष्ठ उपाध्यक्ष वसन्त थकालीले बताए ।

रिकर्भ पुरुष व्यक्तिगत, पुरुष टिम इभेन्ट, मिक्स, महिला व्यक्तिगत तथा महिला समूह र कम्पाउन्ड पुरुष व्यक्तिगत, पुरुष टिम इभेन्ट, मिक्स, महिला व्यक्तिगत तथा महिला समूह इभेन्टमा पदका लागि प्रतिस्पर्धा हुने थकालीले जानकारी दिए । श्रीलंकाको कोलम्बोमा सम्पन्न भएको सागको १० औं संस्करणबाट आर्चरी खेल प्रतियोगितामा समावेश गरिएको थियो ।

नेपालले ११ औं र १२ औं सागमा पुरुष व्यक्तिगततर्फ काश्य पदक जितेको र आफ्नै घरेलु मैदानमा प्रतियोगिता आयोजना गरिएकाले स्वर्ण पदक जित्ने गरी तयारी गरिएको अध्यक्ष गुरुङले बताए । महिला व्यक्तिगतमा स्वर्ण तथा पुरुष समूह र व्यक्तिगतमा समेत पदक आउने सम्भावना रहेको उनको भनाइ छ ।

सम्बन्धित खबर