सोमबार, २७ असोज २०७६
samadhannews
bindedswori home decore

तालवाराही स्कुलः विरोध थेग्न नसक्दा बन्दको सूचना

मङ्गलबार, ३१ भदौ २०७६
108130 पटक पढिएको

अमृत सुवेदी
पोखरा

प्रधानाध्यापकमाथि अनियमिताको आरोप लागेपछि पोखराको बैदामस्थित तालवाराही माध्यमिक विद्यालयमा सूचना टाँसेर बिदा गरिएको छ । प्राधानाध्यापक भद्रकाली लामिछानेको हस्ताक्षरमा सूचना टाँस गरिएको छ । भइपरी, संकट वा चाडवाडका कारण विद्यालय एक्कासी बिदा गरिएको होइन । विद्यालयमा प्राधानाध्यापक लामिछानेमाथि आर्थिक अनियमितता र बिहानी कक्षा सञ्चालनकोसमेत गरी दोहोरो सुविधाको प्रश्न उठेपछि बिदा भएको सूचना टाँसिएको हो । सम्बन्धित निकायले अनुसन्धान र अध्ययन गरिरहेकै बेला लामिछानेले विद्यालयमा लामो बिदा दिएकी हुन् ।

सोमबार बिहान विद्यार्थी झोला बोकेर विद्यालय पुग्दा मुल गेट बन्द देखेपछि अचम्मै गरेका थिए । बिदाको बारेमा अघिल्लो दिन विद्यार्थी र शिक्षकलाई जानकारी गराइएको थिएन । गेटमा टाँसेको सूचना पढेपछि मात्र विद्यार्थीले बिदाको बारेमा जानकारी पाए । सूचनामा सोमबारबाट लागु हुनेगरी कात्तिक १४ गतेसम्मका लागि वद्यालय बन्द रहने उल्लेख छ ।

यस्तो छ आरोप
भद्रकाली लामिछाने नेपाल सरकारको माध्यामिक तह तृत्तीय श्रेणीको शिक्षक हुन् । तर, लामिछानेले द्वित्तीय श्रेणीको तलब लिइरहेकी छन् । विद्यालय व्यवस्थापन समितिबाट निर्णय गराएर १ स्तरवृद्धिको रकम आन्तरिक स्रोतबाट लामिछानेले बुझिरहेकी छन् ।
त्योबाहेक बिहानमा ११ र १२ को कक्षा सञ्चालन गरेबापत उनले थप १९ हजार ६ सय रुपैयाँ रकम थापिरहेकी छन् । प्रअ भत्ता बेग्लै छ । पोहोर विद्यालय व्यवस्थापन समितिले निर्णय गरेर आफूलाई पदोन्नति गरेको लामिछानेको तर्क छ । कामको आधारमा नभइ १ तह माथिको तलब सुविधा बढ्ने गरी अन्य केही शिक्षकको पनि यसरी पदोन्नति भएको छ ।

यिनै विषयलाई लिएर गएको शुक्रबार पोखरा महानगरपालिकामा उजुरी परेको छ । विद्यालय व्यवस्थान समितिको निर्णयबाट योगदानका आधारमा अतिरिक्त रकमको दिन पाउने व्यवस्था छ । तर, स्तरवृद्धिको बारेमा नियम बाहिर गएर व्यवस्थापनले निर्णय गरेको उजुरीमा उल्लेख छ ।

त्यही विषयमा विद्यालयका शिक्षक, विद्यालय व्यवस्थापन समितिबीच नै मतभेदसमेत थियो । यही विषयमा विद्यालयमा विवाद बढेपछि उजुरीका आधारमा अध्ययन गर्न वडा शिक्षा समितिले जिम्मा लियो । समितिले पनि फाइल मागिरहेको थियो । तर, सोमबार एक्कासी कात्तिक १५ गतेसम्म विद्यालय बिदा गरिएको सूचना टाँस भयो । पोखरा महानगरपालिकाका शिक्षा महाशाखाका शाखा अधिकृत वसन्तराज पौडेलको नेतृत्व टोलीले सोमबारदेखि विद्यालयमा अध्ययन थालेको छ ।

वडा र व्यवस्थापन समिति भन्छः झुक्कियौं
विद्यालयमा असहज परिस्थिति सिर्जना भएको भन्दै विद्यालय प्रधानाध्यापक भद्रकाली लामिछानेले वडा शिक्षा समिति संयोजक तथा वडाध्यक्ष जगत पहारीसँग सल्लाह गरेकी थिइन् । यही विषयमा व्यवस्थापन समितिका अध्यक्ष कृष्ण न्यौपानेसँग पनि लामिछानेले छलफल गरिन् ।

लामिछानेले विद्यालयमा असहज परिस्थिति, त्रासको वातावरण सिर्जना भएको कारण देखाउँदै उनीहरुसँगको राय सल्लाहमै असोज १२ गतेसम्म बिदा भएको सूचना टाँसिन् । त्यसलगत्तै दसैं, तिहार र छट लगायतका चाड भएकाले कात्तिक १५ गतेमात्रै विद्यालय खुल्ने सूचनामा छ ।

एक्कासी यसरी लामो समय विद्यालय गरिएको भन्दै शिक्षक, अभिभावक, स्थानीय र विद्यार्थीसमेत विरोध जनाएका छन् । त्यसपछि व्यवस्थापन समिति अध्यक्ष न्यौपाने र शिक्षा समिति संयोजक वडाध्यक्ष पहारीले आफूहरु झुक्किएको बताएका छन् ।

१÷२ दिनका लागिमात्रै बिदा गर्ने भनिएको हुनसक्ने भएकाले अनुमति दिएको तर यति लामो होला भन्ने जानकारी नभएको बताए । ‘स्कुलको घटना बाहिर आइसकेपछि वडाकै अधिकृत सविता ढुंगानाको नेतृत्वमा अध्ययन समिति गठन ग¥यौं । तर, म्याडमले फाइल दिनुभएन । विश्वनाथ भट्टराईको संयोजकत्वमा फेरि अर्को समिति बनाइयो । उहाँ फेरि पनि आउनुभएन,’ वडाध्यक्ष पहारीले भने, ‘हिजो बिदा गर्ने भन्नुभएको थियो । तर, यति लामो बिदा होला भन्ने लागेको थिएन ।’

विद्यालय व्यवस्थापन समिति अध्यक्ष न्यौपाने पनि यस्तै प्रतिक्रिया दिन्छन् । अहिले बिदा लिएपछि आफू चाहिँदा बिदा नपाउने भएकाले शिक्षक कर्मचारीसमेत असन्तुष्ट छन् ।

दबाबपछि विद्यालय खुल्ने, परीक्षा नरोकिने
असोज १ गतेबाट १० कक्षासम्मको आन्तरिक परीक्षा सुरु हुँदै थियो । सोमबारदेखि विद्यालय आकस्मिक रुपमा बिदा भएको सूचना आएपछि परीक्षा नरोक्न भन्दै विद्यार्थीले नाराबाजी गरे ।

कक्षा १० की ऋतिका तामाङले विद्यालयका समस्या भए छानबिनमा सहयोग गरेर परीक्षा नरोक्न भन्दै चिच्याउँदै थिइन् । सरिना गुरुङको माग परीक्षा रोक्नै नहुने थियो । उनीहरुजस्तै थुप्रै विद्यार्थी विद्यालय पोसाकमा आएका थिए । विद्यालय आउँदा बिदा भएको थाहा पाएपछि उनीहरु उनीले विद्यालय गेटमा नाराबाजी गरे ।

उनीहरुसँगै अभिभावक र शिक्षक पनि थपिए । स्थानीयले पनि सोधखोज गर्दै उनीहरुलाई समर्थन दिन थाल्यो । तत्काल पोखरा महानगरपालिकाको टोली पुग्यो । टोलीले वडा शिक्षा समिति र विद्यालय व्यवस्थापन समितिलाई पनि बोलाएर छलफल थाल्यो । विद्यार्थी अभिभावकको दबाबकैबीच असोज १ गतेबाट परीक्षा नरोक्ने गरी विद्यालय खुल्ने भएको छ । परीक्षालाई प्रभावित हुन नदिइ महानगरले विद्यालयमाथि अनुसन्धान र अध्ययन गरिने अधिकृत वसन्तराज पौडेलले जानकारी दिए ।

सम्बन्धित खबर