मङ्गलबार, १३ फागुन २०७६
samadhannews
nepal telecome

नदीपुरमा क्लब स्तरीय भलिबल प्रतियोगिता

बिहिबार, ०९ असोज २०७६
1130 पटक पढिएको

समाधान संवाददाता
पोखरा

नदीपुरस्थित छन्त्याल समाजको प्रांगणमा तेस्रो संस्करणको क्लब स्तरीय भलिबल प्रतियोगिता सुरु भएको छ । पोखरा भलिबल प्रशिक्षण केन्द्रको आयोजनामा आगामी ११ गतेसम्म सञ्चालन हुने प्रतियोगिता बुधबारदेखि सुरु भएको हो ।

प्रतियोगिताको उद्घाटन खेलमा छन्त्याल युवा क्लब म्याग्दी चोकले पोखरा भलिबल प्रशिक्षण केन्द्र निलोलाई २५–१९, १९–२५ र २५–१९ को सेटले पराजित गर्याे । त्यस्तै दोस्रो खेलमा पोखरा भलिबल प्रशिक्षण केन्द्र पहेँलोले १९–२५, २५–१२ र २५–२२ को सेटले कास्की जिल्ला भलिबल प्रशिक्षण केन्द्र रातोलाई पराजित गर्दै अघिल्लो चरणमा प्रवेश गर्‍यो ।

बुधबार भएका अन्तिम खेलमा पर्वतले २७–२५ र २५–१५ को सोझो सेटले कास्की जिल्ला भलिबल प्रशिक्षण केन्द्र निलोलाई पाखा लगाउँदै दोस्रो चरणमा स्थान बनायो । यसअघि राष्ट्रिय खेलकुद परिषदका सदस्य राजेशकुमार गुरुङले प्रतियोगिताको उद्घाटन गरेका थिए ।

कार्यक्रममा गुरुङले खेलकुद विकासका लागि प्रतियोगिताले महत्वपूर्ण भूमिका खेल्ने बताए । उनले मौका नपाएका खेलाडीका लागि प्रतियोगिता राम्रो अवसर बन्न सक्ने उल्लेख गर्दै गुरुङले सबै खेलाडीलाई सफलताको शुभकामना दिए ।

खेलकुदले शरीर स्वस्थ्य राख्न महत्वपूर्ण भूमिका खेल्ने बताउँदै उनले मर्यादित र अनुशासित भएर खेल खेल्नुपर्नेमा जोड दिए । उनले खेलाडीको सेवा सुविधाका लागि सम्बन्धित निकायले ध्यान दिनपर्ने बताउँदै आफ्नोतर्फबाट सदैब पहलकदमी थाल्ने बताए ।

प्रतियोगितका खेल संयोजक तथा राष्ट्रिय रेफ्री अनील गुरुङले क्लब स्तरीय पुरुष भलिबलतर्फ १८, महिलातर्फ ८ र भेट्रान्सतर्फ ७ टिम सहभागी भएको बताए । गुरुङले प्रतियोगिताकोे पुरुषतर्फको बिजेता टिमलाई सिल्ड, मेडल तथा प्रमाणपत्रसहित नगद ५५ हजार ५ सय ५५ रुपैयाँ प्रदान गरिने बताए ।

उनका अनुसार उपविजेता टिमले सिल्ड, मेडल तथा प्रमाणपत्रसहित नगद ३५ हजार ५ सय ५५ रुपैयाँ प्राप्त गर्नेछ भने महिलातर्फको विजेता र उपविजेता टिमलाई क्रमश सिल्ड, मेडल तथा प्रमाणपत्रसहित नगद २० र १३ हजार प्रदान गरिनेछ ।

भेट्रान्सतर्फ विजेता र उपविजेता बन्ने टिमले सिल्ड, मेडल तथा प्रमाणपत्रसहित खसी प्राप्त गर्नेछ । संयोजक गुरुङले प्रतियोगितामा विधागत रुपमा पुरस्कारको व्यवस्था गरिएको बताउँदै प्रतियोगिता अवधिभर विविध सांस्कृतिक कार्यक्रमसमेत समावेश गरिएको जानकारी दिए ।

सम्बन्धित खबर