आइतबार, २९ मङि्सर २०७६
samadhannews
घरपझोङकी मेलिना बनिन् मिस मुस्ताङ

घरपझोङकी मेलिना बनिन् मिस मुस्ताङ

बिहिबार, ०९ असोज २०७६
1750 पटक पढिएको

तस्बिरः आदित्य रसाइली

एसके थकाली
जोमसोम

मुस्ताङको जोमसोममा भएको मुस्ताङ सुन्दरी प्रतियोगितामा मेलिना थकालीले उपाधि हात पारेकी छन् । थाक खेलकुद तथा सांस्कृतिक विकास संघले आयोजना गरेको मुस्ताङ सुन्दरी प्रतियोगिता अन्तर्गत मंगलबार भएको ग्रान्ड फेनालीमा ४ प्रतिस्पर्धीलाई उछिन्दै घरपझोङ गाउँपालिका ३ स्याङकी मेलिना थकाली मुस्ताङ सुन्दरी घोषित भएकी हुन् ।

यस्तै, मिस मुस्ताङको फस्ट रनरअफमा जनहित क्लब जोमसोमकी एलिना गुरुङ र सेकेन्ड रनरअप अन्नपूर्ण युवा क्लब ताक्लुङकी मनिषा हिराचन भएकी छिन् । आइतबार र सोमबार भएको मुस्ताङ सुन्दरी अडिसनको प्रस्तुति मूल्यांकन गर्दै उनलाई निर्णायकहरु अंकिता शेरचन र टशी गुरुङले मुस्ताङ सुन्दरी घोषणा गरेका हुन् ।

मुस्ताङको थाकखोलामा अवस्थित कुल ८ वटा गाउँका युवा क्लबमा आवद्ध मुस्ताङ सुन्दरीले प्रतियोगितामा सहभागी जनाएका हुन् । गत शनिबार र आइतबार मुस्ताङ सुन्दरीको अडिसन भएको हो ।

हिँडाइ, बोलाइ र शारीरिक हाउभाउ लगायत शीर्षकमा १ सय पूर्णांक राखेर मूल्यांकन गरिएको थियो । यस्तै दोस्रो दिनको प्रस्तुतिमा गोलाप्रथाद्वारा मिस मुस्ताङ सुन्दरी प्रतियोगीलाई विभिन्न प्रश्नको उत्तर दिन लगाइएको थियो । पहिलो दिनको प्रस्तुतिलाई मूल्यांकन गरी कुल ८ मध्ये ५ सुन्दरीलाई ग्रान्ड फेनालीमा चयन गरिएको निर्णायक अंकिता शेरचनले बताइन् ।

अन्तिम राउन्डको मुस्ताङ अडिसनमा घोषित मुस्ताङ सुन्दरी मेलिना थकालीलाई महिला सशक्तीकरणका विषयमा मन्तव्य दिन लगाइएको थियो । थकालीले महिला हकअधिकारको संरक्षण र समृद्ध गर्ने स्रोत नै महिला सशक्तीकरण हो भन्ने तार्किक उत्तर दिएकी थिइन् । उनले महिलालाई घरको चौघेरोमा राख्ने विद्यमान प्रवृत्ति अन्त्य गर्दै शिक्षा र स्वास्थ्य लगायतमा महिलालाई पनि समान अवसर हुनुपर्ने धारणा राखेकी थिइन् । आफू मुस्ताङ सुन्दरी भएपछि समाजका कुसंस्कार कुरीति र अन्धविश्वासको अन्त्य गर्न र महिला उत्थानका लागि लड्न प्रतिबद्धतासमेत जनाएकी थिइन् ।

यसअघि मुस्ताङ सुन्दरीको ग्रान्ड फेनाली अडिसनमा टुकुचेकी एलिसा तामाङ, मनिषा हिराचन ताक्लुङ, एलिना गुरुङ जोमसोम, शान्ता केसी कोवाङ र मेलिना थकाली स्याङ, मुस्ताङ सुन्दरीका लागि आमनेसामने भएका थिए । मुस्ताङ सुन्दरी मेलिना थकालीलाई यसअघिकी मुस्ताङ सुन्दरी अपेक्षा थकालीलाई मिस मुस्ताङको ताज पहिराइदिएकी थिइन् ।

फस्ट रनर अप जनहित क्लब जोमसोमकी एलिना गुरुङ र सेकेन्ड रनरअफ अन्नपूर्ण युवा क्लबकी मनिषा हिराचन भइन् ।

सम्बन्धित खबर