सोमबार, २७ असोज २०७६
samadhannews
bindedswori home decore

थकाली सभ्यतामा अंग्रेजी फिल्म

मङ्गलबार, १४ असोज २०७६
600 पटक पढिएको

एसके थकाली
जोमसोम

ऐतिहासिक, धार्मिक, सांस्कृतिक तथा जैविक विविधताले धनी मुस्ताङमा पछिल्लो समय स्वदेशी तथा विदेशी चलचित्र छायांकन गर्ने क्रम बढेको छ । सय वर्ष पुरानो थकाली सभ्यता, रहनसहन र भेषभूषा समेटेर अंग्रजी चलचित्र छायांकनको १ निर्माण युनिट सोमबार मुस्ताङ आएको छ ।

बिबिसी चलचित्रकर्मी तथा यससँग जोडिएका अन्य चलचित्रकर्मी यहाँ आएका हुन् । यसको छायांकन स्थल तथा व्यवस्थापन लोकेसन नेपालले जिम्मा लिएको हो । सय वर्ष पुरानो थाकखोला क्षेत्रमा बसोबास गर्ने थकाली सभ्यताको ऐतिहासिक कथाका लागि मुस्ताङमा २ वर्षअघि अध्ययन र गृहकार्य भएको लोकेसन नेपालले जनाएको छ ।

अंग्रजी विश्व चलचित्र भनिएको यसमा वृतचित्र शैली हुने व्यवस्थापक श्याम बस्नेतले जानकारी दिए । उनले बेलायती निर्माण कम्पनी तथा यसका कलाकार गरी करिब २ सय जनाको टोली मुस्ताङ आएको छ । मुस्ताङको जोमसोमदेखि तल्लो क्षेत्रमा बसोबास गर्ने थकालीका ऐतिहासिक कुरा चलचित्रमा समेटिने व्यवस्थापक बस्नेतले बताए ।

थकाली गाथा समेटिने चलचित्रको नाम भने सार्वजनिक गरिरएको छैन । लोकेसन नेपालका सिइओ तथा लाइन प्रोडुसर गौतम धिमालले चलचित्रको कुनै पक्ष पनि सार्वजनिक नगर्ने सरकारसँग सम्झौता भएको जनाए । थकाली सभ्यताबारे फिल्म बन्ने भने उनले खुलाए ।

स्रोतका अनुसार चलचित्र जोमसोम, कैसाङ क्याम्प, छुसाङ, नाउरिकोट लगायतका स्थानमा छायांकन हुनेछ । निकै महंगो लागत भनिए पनि बजेट खुलाइएको छैन । छायांकनका क्रममा निर्माण गरिने सबै पूर्वाधार स्थानीय स्तरमै हस्तान्तरण गरिने जनाइएको छ । प्राचीन कालमा मुस्ताङमा बस्ने आदिवासी थकालीले के गर्थे, के खान्थे, कुन व्यवसाय गर्थे, उनीहरुको धर्म, संस्कृति, रहनसहन, जीवनशैलीबारे चलचित्रले जानकारी दिनेछ । विभिन्न स्थानमा २ सातासम्म चलचित्र छायांकन हुने सिइओ धिमालले जानकारी दिए ।

सम्बन्धित खबर