सोमबार, २७ असोज २०७६
samadhannews
bindedswori home decore

बलात्कार आरोपले पदच्यूतः महराको राजनीतिक ‘अवसान’

बुधबार, १५ असोज २०७६
1520 पटक पढिएको

समाधान संवाददाता, पोखरा

यौन दुव्र्यवहारको आरोप लागेपछि संघीय संसदको प्रतिनिधि सभामा सभामुख कृष्णबहादुर महराले राजीनामा दिएका छन् । संसद सचिवालयकै महिला कर्मचारीले महरामाथि बलात्कार आरोप लगाएकी छन् । आइतबार राति आफूमाथि बलात्कार भएको भनेकी ती महिलाले मंगलबारसम्म महराविरुद्ध भने प्रहरीमा जाहेरी दिइनन् ।

महिलाले फोन गर्ने बित्तिकै प्रहरी टोली उनको कोठामा पुगेको महानगरीय प्रहरी परिसरका एसएसपी उत्तमराज सुवेदीले बताएका छन् । ‘हामीले लिखित उजुरी दिनुहोस् भन्दा भोलि आउँछु भन्नुभयो। अहिलेसम्म उजुरी दिनुभएको छैन,’ एसएसपी सुवेदीले भने । सुवेदीले लिखित जाहेरी पर्नासाथ अनुसन्धानका लागि प्रक्रिया सुरु गर्ने बताएका छन् ।

सत्तारुढ दल नेकपाले नै महरालाई राजीनामा दिन सुझाव दिएको थियो । घटनाबारे नेकपाका अध्यक्ष एवं प्रधानमन्त्री केपी शर्मा ओली र अर्का अध्यक्ष पुष्पकमल दाहाल प्रचण्डबीच मंगलबार बिहान छलफल भएको थियो । त्यसपछि बसेको पार्टी सचिवालय बैठकले महरालाई राजीनामा दिएर छानबिनको बाटो खुला गरिदिन निर्देशन गरेको थियो ।

मदिरा सेवन गरेर सभामुख महराले आफूमाथि बलात्कार गरेको महिलाको आरोप छ । तर महराले पनि सोमबार राति विज्ञप्ति निकालेर आफूमाथि लागेको आरोप पूर्ण रुपमा कपोलकल्पित र झुट रहेको दाबी गरेका थिए ।

प्रमुख प्रतिपक्षी दल नेपाली कांग्रेसले सभामुख महराले पदबाट राजीनामा दिएको हो कार्यवाहक भन्ने प्रश्न गरेको छ । बलात्कारको आरोप लागेपछि सभामुख महराले मंगलबार पदबाट राजीनामा दिएका छन् । तर, उनले दिएको राजीनामा ‘पत्रमा नैतिकताका आधारमा आजैकै मितिदेखि छानविन प्रक्रिया नसकिँदासम्मका लागि राजीनामा दिएको छु,’ भन्ने उल्लेख छ ।

६ पटक मन्त्री भइसकेका महरा २०४८ सालमा रोल्पाबाट प्रतिनिधिसभामा निर्वाचित थिए । माओवादी नाममा भूमिगत हुनुअघि संयुक्त जनमोर्चाले चुनावमा भाग लिँदा उक्त पार्टीले ९ सिट जितेको थियो । २०६२÷६३ को आन्दोलनपछि पुनःस्थापित संसदमा माओवादीबाट ८३ जना सांसद हुँदा त्यसको नेतृत्व गर्ने महरा नै थिए । त्यसपछि २०६४ र २०७० सालमा उनी रोल्पाबाट संविधान सभामा निर्वाचित भए । २०७४ मा भने दाङ उनको निर्वाचन क्षेत्र रह्यो ।

२०६३ चैतमा गिरिजाप्रसाद कोइराला नेतृत्वको अन्तरिम सरकारमा महरा सूचना तथा सञ्चार मन्त्री बनेका थिए । त्यसपछि २०६५ सालमा बनेको प्रचण्ड नेतृत्वको सरकारमा पनि उनी सूचना तथा सञ्चार मन्त्री बने ।

शेरबहादुर देउवा प्रधानमन्त्री भएका बेलामा उपप्रधान तथा परराष्ट्रमन्त्री, झलनाथ खनाल प्रधानमन्त्री भएका बेलामा उपप्रधान तथा गृहमन्त्री र पुष्पकमल दाहाल प्रधानमन्त्री भएको बेलामा उपप्रधान तथा अर्थमन्त्री भएका थिए ।

सभामुखबाट राजीनामा गर्ने महराको लिखित पत्रले उनको सभामुख पद गएको छ । तर, सोही पत्रका आधारमा मात्र उनको सांसद पद भने जाँदैन । तर बलात्कार आरोपकै कारण सभामुखबाट राजीनामा गर्नुपरेपछि महराको राजनीतिक जीवनको अवसान भएको टिप्पणी गरिएको छ ।

पार्टीले उनलाई सभामुख र सांसद पदबाट राजीनामा गर्न भनेकाले पार्टीको नजरमा अब महरा सांसद नरहेको नेकपा संसदीय दलका उपनेता सुवासचन्द्र नेम्वाङले बताएका छन् । ‘पार्टीले सभामुख र सांसदबाट पनि राजीनामा गर्न भनेपछि पार्टीको नजरमा उहाँ सांसद पनि रहनुहुन्न,’ उपनेता नेम्वाङले भने । तर, कानुनको दृष्टिमा भने महरा आफैँले सांसद पदबाट समेत राजीनामा नदिँदासम्म सांसदको हैसियतमा भने रहनेछन् ।

सम्बन्धित खबर