आइतबार, २५ जेठ २०७७
samadhannews
nepal telecome

पोखरामा साग तयारीः आर्चरी खेल मैदान तयारी तीव्र

शुक्रबार, १५ कार्तिक २०७६
1580 पटक पढिएको

समाधान संवाददाता
पोखरा

पोखरामा १३ औं दक्षिण एसियाली खेलकुद प्रतियोगिता (साग खेलकुद) को तयारी तीव्र पारिएको छ । पोखरामा हुने ९ खेलमध्ये आर्चरी पनि पर्दछ । पोखरा रंगशालाको दक्षिणी भागमा रहेको आर्चरी खेल मैदान निर्माण तथा स्तरोन्नतिको आधाभन्दा बढी काम सकिएको छ ।

कात्तिक २५ सम्म खेलमैदान तयार पार्ने लक्ष्यका साथ निर्माणको काम अघि बढेको कास्की जिल्ला आर्चरी संघका अध्यक्ष योगेन्द्र शेरचनले बताए ।

मैदानलाई समथर पार्ने, सुटिङ लाइन, वैटिङ लाइन ढलान गर्ने लगायत काम अहिले भइरहेको छ । ‘खेलका लागि मुख्य कुरा भनेको मैदान लेभलको हुनुपर्छ,’ उनले भने, ‘सुटिङ लाइन र टागेट लाइन एकै किसिमको हुनुपर्छ, यसैको तयारी भइरहेको छ ।’

आर्चरी पोखरामा नै गर्न संघ पूर्ण रुपमा तयार रहेको उनले सुनाए । आर्चरीका लागि मैदान समथर बनाउन दोस्रो चरणमा खेलमैदान माटोले सम्याउने काम भइरहेको छ । दोस्रो चरणमा माटो फिँजाएपश्चात मैदान समथर पार्ने काम हुने उनने जानकारी दिए ।

मैदान निर्मार्णका लागि ९० लाख माग गरिएको भए पनि केन्द्रले भने २५ लाख मात्र दिने भएको छ । आर्चरी संघले ६ महिनाअघि मागेको भए पनि नखाएपछि मैदानमा दुबो नलगाउने निर्णयमा पुगेको शेरचनको भनाइ छ ।

१३ औं सागका लागि आर्चरीमा नेपालसहित अन्य ५ देश सहभागी हुँदै छन् । आर्चरीका लागि भारत, पाकिस्तान, श्रीलंका, बंगलादेश र भुटान सहभागी हुने शेरचनले बताए ।

१२ औं साग गेममा नेपालले टिम इभेन्ट र पुरुष एकलतर्फ रजत पदक ल्याउन सफल भएको थियो । १३ औँ सागमा नेपालले पदक ल्याउने उनले दाबी गरे । महिला र पुरुष गरी आर्चरीका १० विधामा खेल हुनेछ । निर्माणधीन उक्त मैदानमा नेपाली टोलीले अभ्यास गरिरहेको छ ।

साग खेल अन्तर्गतका ट्रायथोलन, प्याराग्लाइडिङ, आर्चरी, बिच भलिबल, ह्यान्डबल, महिला क्रिक्रेट, महिला फुटबल र भारोत्तोलन प्रतियोगिता पोखरामा सञ्चालन गर्ने योजना छ ।

सोही अनुसार पोखरामा अन्य खेलका भौतिक संरचना निर्माण गर्ने काम पनि तीव्र रुपमा अघि बढेको छ । महिला फुटबलका लागि पोखरा रंगशालामा निर्माणाधीन स्टेडियम निर्माण तीव्र रुपमा अघि बढेको छ । बिच भलिबलका लागि पोखरा ६ बाराही घाटको खेल मैदानमा भलिबल कोर्ट निर्माण भइरहको छ ।

भारोत्तोलन पोखरा १२ मा रहेको एसआर केसी बैंक्युटमा सञ्चालन गरिने छ । महिला क्रिकेट पनि पोखरामा रंगशालाको क्रिकेट मैदानमा गर्ने योजना छ । ब्याडमिन्टन र ह्यान्डबल पोखरा रंगशालामा रहेको बहुद्देश्यीय भवनमा गर्ने योजना छ । सराङकोट तोरीपानीबाट फेवाताल लगायत क्षेत्रमा प्याराग्लाइडिङ प्रतियोगिता गर्ने योजना छ ।

सम्बन्धित खबर