शनिबार, २१ मङि्सर २०७६
samadhannews
लेकसिटी कलेजमा टाइम्स अफ इन्डियाका जिएम

लेकसिटी कलेजमा टाइम्स अफ इन्डियाका जिएम

बिहिबार, १२ मङि्सर २०७६
2430 पटक पढिएको

दक्षिण एसियाकै चर्चित मिडिया हाउस टाइम्स ग्रुपका जनरल म्यानेजर (जिएम) जोन कुरैनले लेकसिटी कलेज एन्ड रिसर्च सेन्टरमा विद्यार्थी माझ ज्ञान र अनुभव बाँडेका छन् । विभिन्न पेसा व्यवसायमा उत्कृष्ट सफलता हाँसिल गरेका व्यक्तिको अनुभव र ज्ञान विद्यार्थीमाझ बाँड्ने उद्देश्य राखेर कलेजले बेलाबेला पाहुनाहरु बोलाउँदै आएको छ । त्यसै क्रममा जोन बिहीबार निम्त्याइएका थिए ।


जोनले आफ्ना मिडिया हाउसबाट प्रकाशन हुने टाइम्स अफ इन्डिया र भारतीय छापा माध्यमले सामना गरिरहेका चुनौतीबारे अवगत गराए । उनले डिजिटल युग र सामाजिक सञ्जालका कारण पत्रिकाहरुको आम्दानी घटिरहेको सुनाए । उनले भने, ‘नयाँनयाँ सिर्जना नभई विज्ञापनदाता आकर्षित गर्न गाह्रो छ ।’ विस्तारै डिजिटल ग्राहक र त्यसको रेभेन्यु वृद्धि हुँदै आइरहेको जोनले सुनाए ।


भारतमा छापा माध्यमको भविष्य कस्तो देख्नुहुन्छ भनेर जोनलाई विद्यार्थीले जिज्ञासा राखेका थिए । ‘अहिलेकै अवस्था हुने हो भने १० वर्षभित्र सबै पत्रिकाहरु डिजिटल भर्सनमा मात्रै सीमित हुन सक्छन्,’ जानेले उत्तर दिए ।


बाहिर आएजस्तो गरी भारतीय पत्रकारिता सरकारको दबाबमा नरहेको जोनको प्रष्टोक्ति थियो । उनले भने, ‘हाम्रो रेभेन्युको २५ प्रतिशतजस्तो सरकारी विज्ञापन होला, तर हामीलाई सरकारको पक्षमा लेख्नुपर्ने कुनै बाध्यता र दबाब छैन ।’ भारतीय पत्रकारहरुले प्रेस स्वतन्त्रताको भरपुर उपयोग गर्न पाउने वातावरण रहेको उनले सुनाए । जोनले विद्यार्थीमाझ अनुभव साट्न पाउँदा खुसी लागेको कलेजका प्रमुख डा. कपिल अधिकारीसँग बताएका थिए । जाेनसँगै कान्तिपुर दैनिकका सर्कुलेसन म्यानेजर मनोज बस्नेतले समेत अनुभव बाँडेका थिए ।


लेकसिटी कलेजमा बिहीबारै अर्का अतिथि लेखक अमर न्यौपानेले पठन संस्कृतिका बारेमा विद्यार्थीहरुलाई विभिन्न जानकारी गराएका थिए । ‘घरघरमा पुस्तकालय र व्यक्तिका झोलाझोलामा किताब भइदिए साह्रै सुन्दर हुन्थ्यो,’ न्यौपानेले भने । उनले पाठ्यपुस्तकसँगै अरु किताबहरु पनि विद्यार्थीहरुलाई हौस्याएका थिए । न्यौपानेले फेवाताल किनारमा आउँदो २७ देखि ३० गतेसम्म हुने नेपाल लिटरेचर फेस्टिभलमा सहभागी हुन विद्यार्थी र कलेज परिवारलाई निम्तोसमेत दिए ।

सम्बन्धित खबर