शनिबार, २१ मङि्सर २०७६
samadhannews
गाउँ ब्लक पुर्जा वितरण

गाउँ ब्लक पुर्जा वितरण

आइतबार, १५ मङि्सर २०७६
440 पटक पढिएको

कृष्ण न्यौपाने
दमौली

नापी कार्यालय तनहुँले आँबुखैरेनी गाउँपालिकास्थित विभिन्न वडाका स्थानीयवासीलाई गाउँ ब्लक पुर्जा वितरण गरेको छ । आँबुखैरेनी गाउँपालिका १, २ र ३ का ८५ जना स्थानीयलाई कार्यालयले गाउँ ब्लक पुर्जा वितरण गरेको हो । वर्षौदेखि जोतभोग गर्दै आएका भूमिहीनलाई नापी कार्यालयले गाउँ ब्लक जग्गाको धनी पुर्जा वितरण गरेको कार्यालय प्रमुख कृष्ण आचार्यले जानकारी दिए ।

गाउँ ब्लक पुर्जा पाउनेमध्ये सबैभन्दा बढी आँबुखैरेनी गाउँपालिका १ का ४० जना स्थानीय छन् । सर्वसाधारणको सहजतालाई ध्यानमा राखी गाउँमै पुगेर त्यहाँका स्थानीयवासी गाउँ ब्लक जग्गाको जग्गाधनी पुर्जा वितरण गरिएको आचार्यले बताए । ‘ग्रामीण भेगका जनतालाई सदरमुकामसम्म आउन नपरोस् भनेर गाउँमै पुगेर पुर्जा वितरण गरिएको हो,’ आचार्यले भने ।

नापी कार्यालयले केही महीना अगाडि आँबुखैरेनी गाउँपालिका ४ भाँगेका २३ र आँबुखैरेनी गाउँपालिका ६ हिलेखर्कका ३३ जनालाई पनि ब्लक पुर्जा वितरण गरेको थियो । पुर्जा पाएपछि स्थानीय खुसी भएका छन् । पुर्जा नहुँदा उनीहरु व्यक्तिगत काम, बैंकबाट ऋण लिने, धितो राख्ने, बेचबिखन गर्न, अंशवण्डा गर्नबाट वञ्चित थिए ।

२०२९ देखि २०३२ सम्म तनहुँमा पहिलो पटक नक्सानाप गरिएको थियो । तत्कालीन समयमा बाक्लो बस्ती बसेको ठाउँ र बस्ती नबसेको ठाउँमा गाउँ ब्लक भनेर एउटै कित्तामा जग्गा नापी गरिएको थियो । एकै ठाउँमा धेरै घर भएका ठाउँमा नापनक्सा हुन छुट भएको थियो । उक्त समयमा ती जग्गामा ब्लक नम्बर लेखिएको थियो । नापी कार्यालयले अहिले त्यही ब्लक नम्बर नापेर भोगको आधारमा पुर्जा वितरण थालेको आचार्यले जानकारी दिए । तनहुँमा २०७१ सालदेखि गाउँ ब्लक नाप्न सुरु गरिएको थियो । नापी कार्यालयका अनुसार जिल्लामा साविकका २२ वटा गाविसमा गाउँ ब्लक छन् । गाउँ ब्लक अन्तर्गत रहेका सर्वसाधारणले कार्यालयमा आएर ब्लक पुर्जा बनाउन सक्ने छन् ।

सम्बन्धित खबर