आइतबार, २८ असार २०७७
samadhannews
nepal telecome

कुन्मिन क्रस कन्ट्रीमा रसिला प्रथम

सोमबार, १४ पुष २०७६
1850 पटक पढिएको

समाधान संवाददाता
पोखरा

चीनको कुन्मिन सहरमा भएको कुन्मिन माउन्टेनियरिङ एन्ड एक्प्लोरेसन जियाओजी क्रस–कन्ट्री दौडमा महिला व्यक्तिगतर्फको उपाधि नेपालले जितेको छ । दौडमा सहभागी रसिला तामाङले हजारौं प्रतिष्पर्धीलाई पछि पार्दै पहिलो स्थान जितेकी हुन् ।

नेपाली टोलीका व्यवस्थापक यामबहादुर गुरुङका अनुसार रसिलाले सो दौड ८ घन्टा ६ मिनेट १९ सेकेन्डमा पूरा गरिन् । चिसो मौसममा ५० किलोमिटरको दौडका क्रममा ४ हजार २ सय ४७ मिटर अग्लो पहाड पार गरेकी उनले स्वर्ण पदकसँगै ४ हजार ५ सय चिनियाँ आरएमबी अर्थात् करिब ७२ हजार नेपाली रुपैयाँ नगद प्राप्त गरिन् ।

सो दौडको पुरुषतर्फको स्पर्धामा नेपाली खेलाडी दुर्गाराज बुढा दोस्रो, दामोदर बुढा तेस्रो र सन्तोषविक्रम विष्ट पाँचौँ बने । दुर्गाले निर्धारित ५० किलोमिटर ६ घन्टा ४६ मिनेट १७ सेकेन्डमा पूरा गरे भने सन्तोषले ७ घन्टा ८ मिनेट १९ सेकेन्ड लगाए । उनीहरुले मेडलसहित क्रमश ३५ सय र २५ सय चिनियाँ आरएमबी पाए । ७ घण्टा ४० मिनेट २४ सेकेन्डमा निर्धारित दूरी पूरा गरेका सन्तोषलाई भने मायाको चिनो मात्र प्रदान गरिएको नेपाली टोलीका प्रशिक्षक गजबहादुर गुरुङले बताए ।

असोज २९ गते पोखरामा आयोजना भएको अन्तर्राष्ट्रिय क्रस कन्ट्री दौड–२०१९ मा पहिलो र दोस्रो हुने नेपाली टोलीका ८ खेलाडीले सो प्रतियोगितामा सहभागिता जनाएका हुन् । सो प्रतियोगितामा व्यक्तिगत र समूहगत रुपले चिनियाँ खेलाडी पनि सहभागी थिए ।

खेलकुदको माध्यमबाट पोखरालाई चिनियाँ पर्यटन बजारमा चिनाउन आयोजित प्रतियोगितामा पहिलो, दोस्रो र तेस्रो हुने टोलीलाई चीनको कुन्मिनमा आयोजना हुने क्रस कन्ट्री दौडमा सामेल गराइने घोषणा गरिएको थियो । घोषणा अनुसार नै पहिलो र दोस्रो हुने नेपाली टोलीले चालु अंग्रेजी वर्षको डिसेम्बर २१ र २२ तारिखमा आयोजना भएको ‘कुन्मिन माउन्टेनियरिङ एन्ड एक्प्लोरेसन जियाओजी क्रस–कन्ट्री दौड मा सहभागिता जनाउने अवसर पाएको हो । नेपालका गणेशसिंह ठकुरीले दौडको क्रममा करिब ३० किलोमिटर गलत बाटोमा दौडँदा उपाधिबाट विमुख बन्नुपरेको टिमका व्यवस्थापक यामबहादुर गुरुङले जानकारी दिए ।

सम्बन्धित खबर