बिहिबार, २५ असार २०७७
samadhannews
nepal telecome

उपसभामुखलाई राजीनामा गराउने नेकपाकाे निर्णय

आइतबार, २७ पुष २०७६
1470 पटक पढिएको

समाधान संवाददाता
काठमाडौं

नेपाल कम्युनिस्ट पार्टी (नेकपा)ले उपसभामुख शिवमाया तुम्बाहाङफेलाई पदबाट राजीनामा गराउने भएको छ । शनिबार प्रधानमन्त्रीको सरकारी निवास बालुवाटारमा बसेको सचिवालय बैठकले यस्तो निर्णय गरेको हो । नेकपाबाट उपसभामुख बनेकी शिवमायालाई राजीनामा गराएर सभामुखको निर्वाचन थाल्ने निर्णय भएको प्रवक्ता नारायणकाजी श्रेष्ठले बताए ।

नेकपाले सभामुख आफैंले लिने गरी प्रक्रिया थाल्ने भएको हो । ‘आजको बैठकले प्रतिनिधिसभामा रिक्त सभामुख पदको सन्दर्भमा निर्णय गरेको छ । रिक्त पदमा हाम्रो पार्टी नेकपाको तर्फबाट उम्मेदवारी दिनेछ,’ प्रवत्ता श्रेष्ठल भने, ‘त्यसका लागि हाम्रो पार्टीका तर्फबाट उपसभामुख पदमा निर्वाचित माननीय शिवमाया तुम्बाहाङफेले राजीनामा दिने निर्णय भएको छ ।’ सभामुख र उपसभामुख एकै दलबाट निर्वाचित नहुने भएकाले त्यसपछि मात्र सभामुख को हुने टुंगो लाग्ने उनले प्रतिक्रिया दिए ।

लामो समयदेखि सभामुखको टुंगो नलाग्दा प्रतिनिधिसभाको बैठक बस्न सकेको छैन । पुस ११ र १६ गते सूचना टाँसेर बैठक स्थगित भएको बैठक बैठक आइतबार बस्दै छ । तत्कालीन माओवादी केन्द्रबाट सभामुख निर्वाचित कृष्णबहादुर महराले राजीनामा दिएपछि सभामुख रिक्त भएको हो । नेकपा एमाले र माओवादी केन्द्र फरक फरक पार्टी हुँदा माओवादीले सभामुख र एमालेले उपसभामुख लिएका थिए । अहिले एमाले र माओवादी केन्द्र एकीकरण भएपछि सभामुख र उपसभामुख दुवै एकै दलले लिन मिल्दैन ।

सभामुखमा नेकपाभित्र पूर्वएमालेका सुवास नेम्वाङको चर्चा छ । पटक पटक सभामुखको जिम्मेवारी निर्वाह गरिसकेका नेम्वाङ प्रधानमन्त्री केपी शर्मा ओली निकट मानिन्छ । पूर्व माओवादीको तर्फबाट अग्नि सापकोटा र पम्फा भुसालको नाम चर्चामा छ । यसअघि आफ्नो भागमा परेकाले साविक माओवादी सभामुख आफ्नो पक्षले पाउनुपर्ने अडानमा छ भने साविक एमाले पार्टी नै एकीकरण भइसकेकाले भागबन्डा खोज्नु नहुने अडानमा छ । नेकपा अध्यक्षद्वय केपी शर्मा ओली र पुष्पकमल दाहालबीच पटक पटक छलफल भए पनि यसबारेमा सहमति जुट्न सकेको छैन ।

वर्तमान उपसभामुख शिवमाया तुम्बाहाङफेले समेत सभामुखम दाबी गरेकी छन् । यसअघि उनलाई मन्त्री नियुक्त गर्ने चर्चा चले पनि उनले अस्वीकार गरेकी थिइन् ।

यता, उपसभामुख तुम्बाहाङ्फेले भने आफूलाई पार्टीको निर्णयबारे जानकारी नभएको जनाएकी छन् । उनले आइतबारको बैठक आफैंले चलाउने जनाएकी छन् । उनले अहिलेसम्मको तालिका अनुसार नै आफू अगाडि बढ्ने जनाइन् । ‘पार्टीको औपचारिक निर्णय आएको छैन, भोलिको बैठक सुचारू हुन्छ’, उनले भनिन् ।

पार्टीको औपचारिक निर्णय हात पारेपछि मात्रै त्यसबारे आफूले निर्णय लिने उनको भनाइ छ । उनी पार्टीले सभामुखको उम्मेदवार तय गरेपछि मात्र उनले राजीनामा दिने मनस्थितिमा छिन् । शुक्रबार अध्यक्षद्वय केपी शर्मा ओली र पुष्पकमल दाहाललाई भेटेर तुम्बाहाङ्फेले आफू सभामुखका लागि योग्य भएको जनाएकी थिइन् ।

सभामुख आफूले लिएर नेकपाले साना दललाई उपसभामुख दिने सम्भावना देखिएको छ । प्रदेश २ को राष्ट्रिय सभा निर्वाचनमा राष्ट्रिय जनता पार्टीसँग तालमेल गरेपछि राजपा संघीय सरकारमा सामेल हुने र प्रदेश सरकारसमेत परिवर्तन हुने सम्भावनासमेत विश्लेषकहरुले औंल्याएका छन् । राजपा वा गत निर्वाचनमा तालमेल गरेको राष्ट्रिय जनमोर्चाबाट उपसभामुख बन्न सक्ने देखिन्छ ।

सम्बन्धित खबर