सोमबार, ०६ माघ २०७६
samadhannews
nepal telecome

मादीको केन्द्र याङ्जाकोटबाट बेतेनीः मतदानबाट आज टुंगो लगाइने

सोमबार, २८ पुष २०७६
10030 पटक पढिएको

समाधान संवाददाता
पोखरा

कास्कीको मादी गाउँपालिकाको केन्द्र याङ्जाकोटबाट बेतेनी साझामा सार्ने विषयमा सहमति नजुट्दा सोमबार मतदान हुने भएको छ । लामो समयदेखिको विवाद, रस्साकस्सी र अवरोध भए पनि आइतबार मतदानबाट टुंगो लगाउने भनिएकोमा साँझ कार्यपालिका सदस्य तितरबितर भएकाले सोमबारलाई सारिएको हो ।

हाल वडा नम्बर ३ को याङ्जाकोटबाट गाउँपालिकाको केन्द्र छ । अब वडा नम्बर ४ को बेतेनी साझामा गाउँपालिकाको प्रशासनिक केन्द्र रहने प्रस्ताव गरिएको छ । हाल केन्द्र रहेको वडा नम्बर ३ का जनप्रतिनिधि बेतेनीको विपक्षमा देखिएका छन् ।

साविकको थुमाकोडाँडामा मादी गाउँपालिकाको केन्द्र हुने गरी स्थानीय तहको घोषणा भयो । नेपाल सरकारले घोषणा गरेअनुरुप थुमाकोडाँडा गाविसको कार्यालय रहेको ठाउँमै गाउँपालिकाको केन्द्र राखियो ।

थप जग्गा नहुँदा प्रशासनिक कार्यालय बनाउने अवस्था नहुँदा साँघुरो भवनमा गाउँपालिकाको केन्द्र चलाउनुको दुख गाउँपालिकाले खेप्यो । गाउँपालिकाको केन्द्र अपायक हुँदा त्योभन्दा पनि ठूलो दुख खेप्नुपरेको मादीका अधिकांश नागरिकको गुनासो थियो । सम्भावित ठाउँको अध्ययन गर्दै मादीको कार्यपालिका बैठकले केन्द्र सार्ने एजेन्डा अगाडि सार्‍यो । तर, स्थानीयको विरोध गाउँ सभा सदस्यबीच एक मत नहुँदा गाउँपालिकाले केन्द्र सार्ने निर्णय हुन सकेको थिएन । याङ्जाकोट केन्द्र तोकिएकोमा गाउँपालिकाको केन्द्र ३२ औं कार्यपालिका बैठकले वडा नम्बर ३ कै देउरालीमा सार्ने निर्णय गर्‍यो । देउरालीमा स्थानीयले गाउँपालिकाका निम्ति जग्गा दान दिने निर्णय पनि गरे । साविकको गाउँपालिकाको केन्द्रदेखि नजिकै अपायकमै कार्यालय सार्न लागिएको भन्दै नागरिकको विरोध यथायतै थियो ।

हिउँदे अधिवेशनको सुरुको दिन गाउँपालिकाको केन्द्र सार्ने प्रमुख एजेन्डा छ । कार्यपालिकाको ३२ औं बैठकले निर्णय गरेको ठाउँ वडा नम्बर ३ को देउराली र वडा नम्बर ४ को बेतेनी साझामध्ये कहाँ केन्द्र तोक्ने भन्ने निर्णय गर्न गाउँ सभा सदस्यले सोमबार मतदान गर्नेछन् । गाउँ सभामा ६२ जना सदस्य छन् । अध्यक्षले मत हाल्न नपाउने व्यवस्था छ । यसअघि गाउँपालिकाको केन्द्र सार्ने कांग्रेसका अधिकांश जनप्रतिनिधिले विरोध गरेका थिए । यसपटक भने कांग्रेसका अधिकांश जनप्रतिनिधिले बेतेनीमा केन्द्र सार्ने पक्षमा देखिएका छन् । बेतेनीमा केन्द्र सार्ने प्रस्ताव गाउँ सभामा अध्यक्ष वेदबहादुर गुरुङले आइतबार पेस गरेका थिए ।

यसअघि गाउँपालिकाको केन्द्र निर्धारण गर्न गाउँपालिका उपाध्यक्षको संयोजकत्वमा प्राविधिकसहित गठित समितिले अध्ययन गरेको थियो । देउराली, कुलेडाँडा, माझाडिही, तारकाङ, साझा भवन काँढे भत्केम्ले, भैंसेलगायत ठाउँमा समितिले स्थलगत अध्ययन गरेको थियो ।

१२ वडा रहेको मादी गाउँपालिकाको केन्द्र सार्न लागिएको बेत्यानीको साझा भन्ने ठाउँ तारकाङ गाउँभन्दा तलको बेंसी, भैंसे भन्ने गाउँको पारिपट्टि पर्छ । धेरै पहिले त्यस ठाउँमा बेतघारी भएको र मादीमा पुल बन्नुअघि बेतकै प्रयोग गरी मादी वारपार गर्ने गरेको भनाइ छ । अहिले त्यो ठाउँलाई साझा पनि भन्ने गर्छन् ।

लमजुङबाट छुट्टिएर कास्कीमा समायोजन भएपछि २०३२÷३३ सालमा साझा सहकारी भवन बनेको थियो । त्यसपछि उक्त ठाउँलाई साझा भन्ने गरिएको हो । मादी करिडोरमा पर्ने साझा भन्ने ठाउँ गाउँपालिकाका धेरैजसो मान्छेहरुका लागि पायक पर्ने भएकाले गाउँसभाबाट पारित हुने कार्यपालिका सदस्य सरोज केसीले बताए ।

जनसंख्या, भौगोलिक अवस्था र सेवाग्राहीको मागलाई सम्बोधन गर्ने गरी गाउँ सभाबाट २ तिहाई बहुमतबाट बेतेनीमा केन्द्र सार्ने निर्णय हुने विश्वास अध्यक्ष वेदबहादुर गुरुङको छ । गाउँ सभाले निर्णयपछि प्रदेशको मन्त्रिपरिषद हुँदै नेपाल सरकारले निर्णय गरेपछि पालिकको केन्द्र कायम हुनेछ ।

सम्बन्धित खबर