बुधबार, ०७ फागुन २०७६
samadhannews
nepal telecome

माननीयको अशोभनीय व्यवहार

बिहिबार, ०९ माघ २०७६
2780 पटक पढिएको

तत्कालीन नेकपा एमालेको समर्थनमा निर्वाचत जितेका प्रदेश सभा सदस्य राजीव गुरुङ (दीपक मनाङे) विवादमा तानिएका छन् । पोखराको भण्डारढिकमा मंगलबार सुरु भएको मुख्यमन्त्री कप फुटबलको उद्घाटन समारोहमा पुगेका उनले एन्फा कास्की अध्यक्ष मीलन गुरुङलाई अपशब्द प्रयोग मात्र गरेनन् हातपात पनि गरे । जुन कुरालाई उनले मिडियाकर्मीसमक्ष बडो गर्वका साथ स्वीकार गरेका छन् ।

मनाङबाट आएका खेलाडीलाई खानबस्न प्रबन्ध नगरेको र अभ्यासका लागि मैदान उपलब्ध नगराएको उनको आरोप थियो । त्यतिमात्र होइन फिफाबाट र सरकारबाट आएको रकममा मिलनले अनियमितता गरेको उनले खुलेरै भने । अनियमितता गरेको भए अनुसन्धान गरी कारवाही गर्ने निकाय हुँदाहुँदै किन हातपात गर्नुभयो भन्ने प्रश्नमा उनले सांसद राजीवको जवाफ थियो, ‘उनीहरु पनि करप्ट छन् ।’ अनि अर्को अचम्म त घटना भएका बेला त्यहाँ रहेका प्रहरी केबल मुकदर्शक बने । यति सांसद दीपकको ठाउँमा दोस्रो व्यक्तिले हातपात गरेको भए अवस्था के हुन्थ्यो होला ?

राजीव गुरुङले राजनीतिक आवरण र संरक्षणमा धेरै पहिलादेखि अपराधजन्य क्रियाकलाप गर्दै आएको सञ्चारमाध्यममा सार्वजनिक हुँदै आएका थिए । यसअघिक उनका क्रियाकलाप काठमाडौं केन्द्रित थिए । लामो समय नेपाली कांग्रेसको तरुण दलमा आबद्ध राजीव गुरुङ पछिल्लो समय राप्रपामा आबद्ध भए । स्वतन्त्र रुपमा उठेका उनी तत्कालीन एमालेको सहयोगमा प्रदेश सभा चुनावमा मनाङ ‘ख’ बाट निर्वाचित पनि भए । तर उनीमाथि फौजदारी अभियोग लागेका कारण त्यतिबेला पोखरा आएर सपथ खान पाएका थिएनन् । निर्वाचित भएको १६ महिनापछि २०७५ माघ १४ गतेमात्र उनले सपथ खाएका थिए ।

निर्वाचन लगत्तै उनमाथि फौजदारी अभियोग लागेका कारण केही समय सम्पर्कमा रहेनन् । कानुनी भाषामा फरार रहे । २०७५ वैशाखमा पक्राउ परेपछि जेल परेका उनी सर्वोच्चको आदेशले छुटेपछि उनी पोखरा आएर सपथ खाएका हुन् । उनलाई गत असार १९ मा नेकपा प्रदेश इन्चार्ज तथा मुख्यमन्त्री पृथ्वी सुब्बा गुरुङले पार्टीमा भित्र्याएका हुन् ।

पार्टी प्रवेश गराएका दिन मुख्यमन्त्री गुरुङले भनेका थिए, ‘समय र परिवेशले कोही व्यक्ति कुनै गलत काममा लागे पनि सुध्रने मौका पाए सुध्रिन्छ ।’ सांसद राजीवका हकमा पनि यो कुरा लागु हुन्छ भन्ने विश्वास आम जनमानसमा थियो । तर उनको बानी सुध्रिएको देखिएन । राजीव गुरुङ अहिले दीपक मनाङे होइनन् । उनी त जनताले मत दिएर जिताएका जनप्रतिनिधि हुन् । त्यसैले उनले गर्ने व्यवहार अब पहिलाको ‘दीपक मनाङे’को जस्तो हुनु हुँदैन । अहिले उनी ‘माननीय’ हुन् । माननीयले माननीयजस्तै व्यहावर प्रस्तुत गर्नु पर्‍यो नि ।

नेपालकै कानुन अनुसार निर्वाचित भएर आएको अनि कानुन बनाउने जिम्मा लिएर संसदमा सपथ खाएको व्यक्ति जथाभावी गर्दै हिँड्नु लोकतन्त्रप्रतिकै उपहास हो । संसद अधिवेशन चलिरहेका बेला र अझ गण्डकी प्रदेश सभाका सदस्यले सपथ खाएको २ वर्ष पुगेकै दिन ‘माननीय’ बाट यो घटना भएको छ । मुलुकमा कानुन कार्यान्वयनको अवस्था सन्तोषजनक छैन भन्दैमा सार्वनिकस्थलमा मान्छे कुट्दै हिँड्न र जेपायो त्यही बोल्न कसैलाई पनि छुट छैन । एन्फा कास्कीमा अनियमितता भएको छ भने सम्बन्धित निकायले छानबिन तत्काल थालोस् । लोकतन्त्र, कानुनी शासन र संघीयताको मर्मलाई आत्मसात गर्दै यो विषयलाई सांसद राजीव गुरुङको पार्टी नेकपा र गण्डकी प्रदेश सभाले गम्भीर रुपमा लिनुपर्छ ।

सम्बन्धित खबर