आइतबार, १६ चैत २०७६
samadhannews
nepal telecome

जापानी धावक ताकानासीलाई म्याराथन उपाधि

आइतबार, ०४ फागुन २०७६
1390 पटक पढिएको

समाधान संवाददाता
पोखरा

भूतपूर्व खेलाडी मञ्च नेपालले आयोजना गरेको १४ औं सफल पोखरा अन्तर्राष्ट्रिय म्याराथन उपाधि जापानका ताकानासी युसुकीले हात पारेका छन् । युसुकीले ४२.१९५ किमी दौडमा नेपालका किरण सिंह बोगटीलाई पछि पार्दै उपाधि जितेका हुन् । बोगटी १३ औं दक्षिण एसियाली खेलकुद (साग)का पदक विजेता हुन् ।

१ सय ५ धावकलाई पछि पार्दै ताकानासीले दौड २ घन्टा २६ मिनेट ५१ सेकेन्डमा पूरा गरे । युसुकीले नगद २ लाख जिते । २३ वर्षीय ताकानासीले पोखरासँग भगिनी सम्बन्ध रहेको जापानको कोमागाने सहरबाट प्रतिनिधित्व गर्दै पोखरा आएका हुन् । ताकानासीभन्दा १ मिनेट ५७ सेकेन्ड ढिलो दूरी पार गरेका नेपाली धावक सशस्त्र प्रहरी बलका किरणसिंह बोगटी दोस्रो बने । उनले नगद १ लाखमा चित्त बुझाए ।

२ घन्टा २९ मिनेटमा दूरी पार गर्दै एपिएफ गण्डकी प्रदेशका अनिस थापामगर तेस्रो बने । उनले ७५ हजार पाए । एपिएफकै गणेशसिंह ठकुरीले २ घन्टा ४१ मिनेट ६ सेकेन्डमा दूरी पार गर्दै चौथो स्थान हासिल गरे । ठकुरीले १५ हजार हात पारे । १० किलोमिटर सडक दौडमा पुरुषतर्फ स्याङ्जाका पूर्णबहादुर कार्की प्रथम भए । उनले यो दूरी ४० मिनेट ४२ सेकेन्डमा पार गरे । ४१ मिनेट ३१ सेकेन्डमा लक्ष्य पार गर्दै याङदेव राई दोस्रो भए । ४१ मिनेट ४० सेकेन्डमा पार गर्दै पर्वतका आशीष कुँवर तेस्रो पुरस्कारका हकदार बने ।

१० किलोमिटर दौड महिलातर्फ धरानकी इन्द्रकला नेम्बाङ प्रथम भइन् । उनले निर्धारित दूरी ५१ मिनेट २० सेकेन्डमा पार गरिन् । ५३ मिनेट २७ सेकेन्डमा यो दुरी पार गर्दै सोलुखुम्बुकी अनिता राई दोस्रो र ५४ मिनेट ४७ सेकेन्डमा पार गर्दै अमेरिकाकी विन्डी तेस्रो बने । प्रतियोगितामा प्रथम, द्वितीय र तृतीय हुनेले क्रमश १५ हजार, १० हजार र ५ हजार जितेका छन् । पोखराका ७३ वर्षीय टंकबहादुर श्रेष्ठले १० किलोमिटर सडक दौड पूा गरेका छन् ।

५ किलोमिटर पुरुष सडक दौडमा कुमुदिनी होम्सका विनोद गुरुङ प्रथम भए । उनले निर्धारित दूरी १७ मिनेट ५३ सेकेन्डमा पार गरे । यो दुरी १८ मिनेट ३७ सेकेन्डमा पार गर्दै माछापुच्छ्रे गाउँपालिकाको ज्ञानज्योति माविका विवेक भुजेल दोस्रो र १९ मिनेट ४० सेकेन्डमा पार गर्दै न्यु लाइट बोर्डिङ स्कुलका प्रदीप भुजेल तेस्रो बने । ५ किलोमिटर महिला दौडमा धम्पुस उदय माविकी विनु विक प्रथम भइन् । विकले २३ मिनेट ६० सेकेन्डमा दूरी पार गरिन् । प्रतियोगितामा प्रतीक्षा सुवेदी दोश्रो र माधुरीदेवी कुर्मी तेस्रो बने । ५ किलोमिटर दौडमा पहिलो हुने महिला÷पुरुषले १० हजार, दोस्रोले ७ हजार र तेस्रोले ५ हजार पाएका छन् ।

ह्विलचियर दौड पुरुषतर्फ सुरेश गौली प्रथम भए । भरत अधिकारी दोस्रो र खुमबहादुर पाण्डे तेस्रो बने । महिला ह्विलचियर प्रतियोगितामा पुनम विक प्रथम, धना मगर दोस्रो र लक्ष्मी सुनार तेस्रो भए । दुवै इभेन्टमा पहिलो हुनेले ५ हजार, दोस्रो हुनेले ३ हजार र दोस्रो हुनेले २ हजार पाएका छन् ।

दृष्टिविहीनको १ सय मिटर दौडमा पुरुषतर्फ प्रमोद दाहाल प्रथम, आशीष खड्की दोस्रो र प्रेम क्षेत्री तेस्रो भए । महिलातर्फ वीनित सुनार प्रथम, सृजना परियार दोस्रोे र सुकमाया विक तेस्रा भएका छन् । दुवै प्रतियोगितामा प्रथमलाई ५ हजार, दोस्रालाई ३ हजार र तेस्रालाई २ हजार प्रदान गरियो ।

१४ औं संस्करणको सफल पोखरा अन्तराष्ट्रिय म्याराथनमा सफल पार्न पिस रनमा १२ देशका २१ जना विदेशी धावक सहभागी भएको मञ्चका अध्यक्ष तेजबहादुर गुरुङले जानकारी दिए । बेलायतबाट ५० जनाभन्दा बढीले म्याराथनमा सहभागिता जनाएका छन् । पोखरा म्याराथनकी संयोजकसमेत रहेकी भलिबलकी पूर्व राष्ट्रिय खेलाडी मञ्जु गुरुङ राइले १० किलोमिटर दौड पूरा गरिन् । क्यान्सर रोग निको भएर समाजसेवा र खेलकुदमा सक्रिय मञ्जुले स्वास्थ्य रहन दौडनुपर्छ भन्ने सन्देश दिन आफू पोखरा आएको बताइन् ।

बेलायतका क्यानसर पीडित धावक पाण्डव महतोले ३ घन्टा ३१ मिनेटमा ४२.१९५ किलोमिटर दौड पूरा गरे । खेलकुदले नै रोगलाई जित्न सक्छ भन्ने सन्देश लिएर आएको उनको भनाइ छ ।

पोखरा म्याराथनलाई गैरआवासीय नेपाली संघ युके अध्यक्ष पुनम गुरुङले संघको तर्फबाट१ लाख सहयोग गरिन् । गैर आवासीय नेपाली संघ हङकङ अध्यक्ष टीका गुरुङले पोखरा म्याराथनलाई २५ हजार प्रदान गरिन् ।

गण्डकी प्रदेशका मुख्यमन्त्री पृथ्बीसुब्बा गुरुङले दौड सुरुआत गरेका हुन् । प्रतियोगितामा ओलम्पियन बैकुण्ठ मानन्धर विश्व शान्तिको कामनासहित पिस टर्च लिएर दौडिए । प्रदेशका उद्योग पर्यटन वन तथा वातावरण मन्त्री विकास लम्साल, प्रदेश सांसदद्वय राजीव पहारी, र कृष्ण थापा, पोखराका व्यवसायी अशोक पालिखे लगायतले ५ किलोमिटर दूरी पार गरे ।

विजयी खेलाडीलाई लक्ष्मी हाउसका अध्यक्ष गणेशबहादुर श्रेष्ठ, पोखरेली मञ्च युके अध्यक्ष मानप्रसाद गुरुङ, संयोजक मञ्जु गुरुङ, नेपाल पत्रकार महासंघ कास्की अध्यक्ष दीपेन्द्र श्रेष्ठ लगायतले पुरस्कार वितरण गरे ।

रन फर फनमा पोखरा महानगरका मेयर मानबहादुर जिसी, गण्डकी प्रदेशका आर्थिक मामिला तथा योजना मन्त्री किरण गुरुङसहितका व्यक्तित्व सहभागी भएका थिए । धावकहरुलाई पोखरेलीले विभिन्न ठाउँमा स्वागत गरेका थिए । प्रतियोगितालाई प्रतिष्ठित औद्योगिक प्रतिष्ठान लक्ष्मी गु्रप अन्तर्गतको सुजल डेरीको उत्पादन सफल दूधले मुख्य प्रायोजन गरेको छ ।

सम्बन्धित खबर