शुक्रबार, २१ चैत २०७६
samadhannews
nepal telecome

सेन्टी भाइरसको आधा नाफा रंगशालालाई

मङ्गलबार, ०६ फागुन २०७६
1010 पटक पढिएको

पुनम शर्मा
पोखरा

कलाकार सीताराम कट्टेल धुर्मुसले चलचित्र सेन्टीभाइरसको आधा नाफा चितवनमा निर्माणाधीन गौतमबुद्ध क्रिकेट रंगशालालाई दिने घोषणा गरेका छन् । चलचित्रका निर्माता धुर्मस र उनकी श्रीमती सुन्तलीको धुर्मुस सुन्तली फाउन्डेसनले चितवनमा अन्तर्राष्ट्रिय स्तरको क्रिकेट रंगशाला बनाउँदै छ ।

चलचित्रको प्रचारका लागि पोखरा आएका धुर्मसले चलचित्र पत्रकार संघ नेपाल कास्कीले आयोजना गरेको पत्रकार भेटघाटमा यस्तो घोषणा गरेका हुन् । उनले चलचित्र हेरेर रंगशाला निर्माणमा सहयोग गर्न आग्रहसमेत गरे । आफूले कहिल्यै राजनीति नगर्ने जनाउँदै उनले परिस्थितिका कारण कलाकारितासँगै समाजसेवामा आएको बताए ।

उनले कलाकारिता क्षेत्रमा परिपक्व भइनसकेको सुनाए । उनले भने, ‘म सिक्दै छु । अझै राम्रो गरौं भन्ने सधै लागिरहन्छ ।’ समाजसेवा स्वयंसेवी भए पनि ६ वटा कम्पनीको सद्भावना दूत भएकाले आफ्नो जीवन चलेको उनले सुनाए । चलचित्रमा उनले आफू र सुन्तलीकै प्रमुख भूमिका रहने जानकारी दिए । उनले भने, ‘म र कुञ्जना दुवैलाई मुख्य भूमिकामा दर्शकले पाउने छन् ।’

अहिले बिहानदेखि बेलुकासम्म रंगशाला निर्माणमै व्यस्त रहनुपरेको उल्लेख गर्दै उनले रंगशाला बनिसकेपछि कलाकारितामै लाग्ने उद्घोष गरे । चितवनको क्रिकेट रंगशाला अबको २ वर्षभित्र बनिसक्ने उनको भनाइ छ ।

सेन्टी भाइरस फिल्म रामबाबु गुरुङले निर्देशन गरेका छन् । यसमा सीताराम कट्टेल धुमुर्स, कुञ्जना घिमिरे सुन्तलीसहति दयाहाङ राई, सन्दीप क्षेत्री, बुद्धि तामाङ, कमलमणि नेपाल, विल्सनविक्रम राई, दीपक आचार्य, राजाराम पौडेल, सूर्यमाला खनाल, वसन्त भट्ट, युवराज भण्डारी लगायतको अभिनय छ । यसका निर्माता डिन्डु लामा ह्योल्मो हुन् । कुमार कट्टेल र दीपक आचार्यले लेखेको चलचित्रमा शैलेन्द्र डी कार्कीको छायांकन छ । चलचित्र निमेष श्रेष्ठले सम्पादन गरेका छन् ।

चलचित्र पत्रकार संघ नेपाल कास्की अध्यक्ष अरुण गिरी अध्यक्षतामा कार्यक्रम भएको हो ।

सम्बन्धित खबर