शुक्रबार, २१ चैत २०७६
samadhannews
nepal telecome

१८ औं आहा रारा गोल्डकप भोलिदेखि

बुधबार, २१ फागुन २०७६
1150 पटक पढिएको

समाधान संवाददाता
पोखरा

सहारा क्लबले आयोजना गरेको १८ औं संस्करणको आहा रारा गोल्डकपको तयारी पूरा भएको छ । प्रतियोगितामा आयोजक, ए डिभिजन क्लब र विदेशी क्लबसहित १० टिम सहभागी हुनेछन् । आयोजक सहारा क्लब, झापा ११, ए डिभिजन क्लबहरु रुसलान थ्री स्टार, नेपाल आयल निगम मनाङ मस्र्याङ्दी, बिग्रेड ब्वाइज क्लब, संकटा क्लब तथा विभागीय टोली त्रिभुवन आर्मी क्लब, एपिएफ र नेपाल पुलिस र भारतको गान्टोक सिटी फुटबल क्लब सहभागी हुने आयोजकले जनाएको छ । प्रतियोगिता विजेताले १० लाख १ हजार र उपविजेताले ५ लाख १ हजारसहित मेडल प्रमाणपत्र ट्रफी पाउने छन् ।

१ करोड १८ लाख १ हजार रुपैयाँ आम्दानी र ९९ लाख ३८ हजार ५ सय रुपैयाँ खर्च हुने आयोजकको अनुमान छ । प्रतियोगिताबाट बचत हुने रकम क्लबले सञ्चालन गरेको एकेडेमीका लागि खर्च गर्नेछ । एकेडमीमा १४ जिल्लाका २४ जना बालक आश्रित छन् ।

क्लबले वर्षेनि प्रदान गर्दै आएको ‘सर्वोत्कृष्ट राष्ट्रिय फुटबल खेलाडी सम्मान २०७६ बाट नेपाली राष्ट्रिय फुटबल टिमका सदस्य सुजल श्रेष्ठलाई सम्मान गरिने भएको छ । फुटबल खेलको विकासमा योगदान पु¥याउने खेलाडीमध्ये १ खेलाडीलाई क्लबले प्रत्येक वर्ष सम्मान गर्दै आएको छ । उनले ३५ हजार, सम्मानपत्र र दोसल्ला प्राप्त गर्नेछन् ।

फागुन २२ गतेदेखि पोखरा रंगशाला निमार्णाधीन फुटबल मैदानमा १८ औं संस्करणको फुटबल प्रतियोगिता सुरु हँुदै छ । प्रतियोगिताको उद्घाटन खेल आयोजक सहारा क्लब र बिग्रेड ब्वाइज क्लबबीच हुनेछ । मंगलबार आयोजित पत्रकार सम्मेलनमा प्रतियोगिताबारे जानकारी दिँदै क्लबका अध्यक्ष केशवबहादुर थापाले प्रतियोगिताबाट उठेको रकम एकेडेमी सञ्चालनमा खर्च गर्ने बताए । यसैबीच सांसद सूर्यबहादुर केसीले राज्यले अझै पनि खेलकुदको विकास उचित ढंगले गर्न नसकेको बताए ।

प्रतियोगिताको प्रिक्वाटर फाइनल खेल अवलोकनका लागि १ सय, क्वाटर फाइनल खेलका लागि १ सय ५०, सेमिफाइनल खेलका लागि २ सय र फाइनल खेलका लागि २ सय ५० रुपैयाँको टिकट काट्नुपर्ने छ । प्रतियोगिता अवधि र सिजनल टिकटका लागि १ हजार ५ सय रुपैयाँको टिकट काट्नुपर्ने आयोजकले जनाएको छ । प्रतियोगिता अवधिभर दर्शकलाई सजिलो र भडि कम गर्न पोखरा रंगशालाका ६ वटै गेट खुला गरिने छ ।

सम्बन्धित खबर