मङ्गलबार, २३ असार २०७७
samadhannews
nepal telecome

१८ औं आहा रारा गोल्डकपः गान्तोकलाई रोकेर थ्रिस्टार सेमीफाइनलमा

मङ्गलबार, २७ फागुन २०७६
1670 पटक पढिएको

समाधान संवाददाता
पोखरा

१८ औं आहा रारा गोल्डकपमा भारतीय टिम गान्तोक फुटबल क्लबलाई ३–० ले हराउँदै रुस्लान थ्रिस्टार फुटबल क्लब सेमिफाइनल प्रवेश गरेको छ । सोमबार पोखरा रंगशलामा भएको क्वाटरफाइनल खेलमा थ्रिस्टारका खेलाडी दिपेश घलेको पासमा सन्जोक राईले गोल गरे ।

दोस्रो हाफको इन्जुरी टाइममा मात्र सुशन श्रेष्ठले २ गोल गरे । खेलको ९२ औं मिनेटमा र ९३ औं मिनेटमा गान्तोक सिटी फुटबल क्लबका खेलाडीको नियन्त्रणमा रहेको बल आफ्नो अधिनमा राख्दै श्रेष्ठले गोल गरेका हुन् ।

खेलको निधारित समयमा गान्तोकको तर्फबाट गोल हुन सकेन । खेलको ३७ औं मिनेटमा सुशील राईको पासमा सन्जोक राईले प्रहार गरेको बल गान्तोकका खेलाडीले डि बक्स भित्रबाट क्लियर गरिदिए । खेलको ७० औं मिनेटमा अनन्त तामाङको पासमा सन्जोक राइले प्रहार गरेको बल क्रसबारबाट बाहिरियो । ९० औं मिनेटमा दिपेश घलेको पासमा सुशील राईले गरेको प्रहार गान्तोकका किपर नमोदीप लेप्चाले बचाउ गरे ।

गान्तोकका लागि ४३ औं मिनेटमा डन टेसिरिङ लेप्चाले प्रहार गरेको बल क्रसबारबाट बाहिरियो । खेलको ८३ औं मिनेटमा टि देन्डुप भुटियाले प्रहार गरेको बल थ्रिस्टारका किपर पुरन जेमजोङले उत्कृष्ट बचाउ गरे ।

खेलको पहिलो हाफमा दुवै टिमका खेलाडीले फिनिसिङ निकाल्न सकेनन् । दोस्रो हाफमा गान्तोक सिटीले पाएको बलमा पनि फिनिसिङ निस्कन सकेन । खेलमा दुवै टिमले बल बराबर जस्तो नियन्त्रणमा लिए पनि गान्तोक सिटीले नतिजा निकाल्न सकेन । सोमबारको खेलमा म्यान अफ दि म्याच थ्रि स्टार फुटबल क्लबका सुशन श्रेष्ठ भए । उनले दोस्रो हाफको इन्जुरी समयमा २ गोल गरेका थिए ।

गान्तोक फुटबल क्लबका कोच मोल डिक लेप्चाले रेफ्रीको निर्णयमा असन्तुष्टि जनाए । पहिलो गोलमा नै रेफ्रीले अफसाइड नदिएको उनले गुनासो गरे । १ पटक डि बक्सभित्र थ्रिस्टारका खेलाडीले किपरलाई दिएको बल किपरले सिधै हातले समात्दा फल नदिएको उनले गुनासो गरे । गान्तोक सिटी क्लब १ वर्षअघि मात्र स्थापना भएको क्लब भएकाले कम उमेरमा धेरै खेलाडी रहेको उनको भनाइ छ ।

थ्रिस्टारका कोच मेघराज केसीले टिममा नयाँ खेलाडी धेरै भएकाले खेलको पहिलो हाफमा नतिजा ल्याउन नसकेको स्वीकारे । ‘फुटबलमा खेलभन्दा पनि नतिजा चाहिन्छ,’ केसीले भने, ‘हामीले नतिजा निकालेर देखायौं ।’ केसीले थ्रिस्टार क्लबमा ९ खेलाडी नयाँ र कम उमेरका रहेकाले विगतमा जस्तो खेल अहिले प्रदर्शन गर्न नसकेको जनाए । केसीले आगामी वर्ष ९ खेलाडी परिपक्व भएपछि उत्कृष्ट प्रदर्शन गर्ने प्रतिवद्धता गरे ।

मंगलबार संकटा फुटबल क्लब र त्रिभुवन आर्मी क्लबबीच आहा राराको अन्तिम क्वाटर फाइनल खेल हुनेछ । थ्रिस्टार र गान्तोकले सिधै क्वाटर फाइनल खेलेका हुन् । खेल जितेको थ्रिस्टारले बुधबार नेपाल पुलिस क्लबसँग सेमिफाइनल खेल्नेछ ।

सम्बन्धित खबर